Kumba 25,000 ngut ki samla kiba phiel Matrik man la u snem naduh 2015 -2024
Poi 124 tylli ki skul ba phiel lut ha u 2024

Shillong, K’Lyngkot 22 : Ki don ym duna ïa ka 20,000 – 25,000 ngut ki samla pule kiba phiel ha ka eksam Matrik ne ka Secondary School Leaving Certificate (SSLC) ha ka shisnem shisnem lada peit katkum ki jingkheiñ naduh ka snem 2015 – 2024.
Katkum ki jingtip ba la ai da u Myntri Rangbah ka Jylla, Conrad K Sangma ha ka sngi Balang, la kdew ba ha u snem 2015 ki don haduh 45,867 ngut ki samla kiba ïakhun ïa ka eksam matrik hynrei kiba pass ki long tang 24,360 ngut kaba poi tang kumba 53.11 persen ei ei.
Ha u 2016 pat la kdew ba ki don 50,126 ngut kiba ïakhun bad kiba pass ki long 27,119 ngut ne kumba 54.10 persen.
Ha u snem 2017 kiba ïakhun ki poi 50,974 ngut bad kiba pass ki long 27,547 ngut ne 54.04 persen.
Shuh shuh la kdew ba ha u snem 2018 pat ki don 50,007 ngut kiba ïakhun bad kiba pass ki long 28,424 ngut ne kumba 56.76 persen.
Ha u snem 2019 kiba ïakhun ki long 50,050 ngut bad kiba pass ki long 27,887 ngut ne 55.72 persen.
Katba ha u snem 2020 kiba ïakhun ïa kane ka eksam ki poi 50,081 ngut bad kiba pass ki long 25,195 ngut ne 50.31 persen.
Ha u snem 2021 kiba thoh ïa kane ka eksam ki la poi haduh 64,269 ngut bad kiba pass ki long 34,000 ngut ne kumba 52.90 ngut.
Katba ha u snem 2022 kiba ïakhun ki long 57,371 ngut bad kiba pass ki long 32,678 ngut ne 56.96 persen.
Ha u snem 2023 kiba thoh ïa kane ka eksam ki long 51,280 ngut bad kiba pass ki long 26,629 ngut ne kumba 51.93 persen.
Bad ha u snem 2024 ki don 54,134 ngut ki khynnah kiba thoh ïa kane ka eksam bad kiba pass ki long 30,208 ngut ne kumba 55.80 persen.
Hadien kane, u Myntri Rangbah u la ïathuh ruh ba ki don ruh haduh 36 tylli ki skul kiba ïoh Nod ha ka jingdon ki khynnah ba pass Matrik ha kine ki lai snem. Nangta ki don ruh haduh 124 tylli ki skul kiba ym don satia kiba pass ha kane ka eksam Matrik ha u snem 2024.
U ïathuh ruh ba ki don haduh 146 tylli ki skul kiba ym don satia ba pass iwei ruh ha ka snem 2023 bad haduh 118 tylli ki skul kiba ym don ba pass iwei ruh ha u snem 2022.