Mih sa ki seng na rilum Garo halor jingeh ki paid Garo basah ha khappud Meghalaya-Assam

Shillong, Jylliew 11: Ka kynhun ki sengbhalang na rilum Garo ba kynthup naduh ka TSCF, NTDF, GGU, ADE, FKJGP, FAF, AYWO ha ka jingïalang kaba long ha ka 06tarik mynta u bnai ki la pynpaw ïa ka jingsngewkhia kaba jur halor ka jingshah ñion beiñ ki paid Garo kiba sah ha khappud jong ka jylla Meghalaya – Assam hadien ba la dep ban ïa soi ïa ka soskular pynbeit pud hapdeng u Myntri Rangbah ka jylla Meghalaya bad Assam.
Katkum ka kyrwoh la ong ba kitei ki sengbhalang na rilum Garo ki la ïeng lang kawei ka mynsiem ban don ha syndah bad kitei ki para jait kiba don ha khappud Meghalaya bad Assam bad pynpaw ruh ba ka sorkar Meghalaya kan shim lang ka jingkitkhlieh na ka bynta baroh ki jingjia bapher bapher kiba la mih kiba ktah ïa ki paid Garo kiba sah ha khappud.
Shuh shuh la ong ruh ba ïa u pud u sam dei ban pynieng ha ryngkat ka jingdonlang ki bor sorkar na baroh artylli ki jylla bad ruh ki bor sorkar jong ka sorkar pdeng.
“Ka sorkar Meghalaya kadei ruh ban tuklar halor ka jingshah leh bymhok kiba la jia ïa ki paid Garo kiba don ha khappud ka Assam bad Meghalaya hadien ba la dep ban soi ïa ka soskular. Kane ka jingjia kaba mih hadien ka jingsoi ïa ka soskular ka lah ruh ban ktah wat ïa ka jingsngewïapher hadien habud lada ym lah pynbeit noh mardor,” ong ka kyrwoh.
La ong ruh ba ki paid Garo kiba sah ha ki shnong Garo ba don ha khappud jong kitei ki ar jylla naduh ki longshwa manshwa ki im ha ka jingsuk jingsaiñ bad kim ju shah pynthut ha kata ka ishu pud u sam da kaba kem lane pynthut ïa ki. “Kumta ngi dawa na ka sorkar Meghalaya ba kadei ban shim ïa ka jingkitkhlieh halor kitei ki jingjia kiba mih hadien ka jingsoi ïa ka MOU,” bynrap biang ka kyrwoh ba la phah da u Gredalsan Ch. Momin, General Secretary, TGSCF, Meril N. Sangma, General Secretary, GGU, Lyndon Ch. Momin, General Secretary, NTDF, Dalseng Bira Ch. Momin, ADE, Apex Committee (HQ-Tura), Pritam Arengh, President, FKJGP, Garo Hills Zone, Sengbath Ch. Marak, President, AYWO (CGB) (HQ-Tura) bad u Brimbal M. Sangma, President, FAF (CEC) (HQ-Tura).