Shillong, K’ Lyngkot 17: Ka Nehru Yuva Kendra Shillong ha ka jingïatreilang bad ka Traffic Police Department, East Khasi Hills District, Shillong hapoh ka jingïalam jong u K. Prasad, MPS S.P. Traffic branch, Shillong ki la pynlong ïa ka jingïalap halor ki jingdonkam ki lad jingïada hapoh surok ne ka Road Safety awareness Campaign kaba long ruh kum ka dak ban rakhe ïa ka National Road Safety Week 2025 kaba la sdang naduh ka sngi Thohdieng ka 17 tarik bad ka ban bteng haduh ka 23 tarik mynta u bnai, 2025.
Kumba long ha kane ka sngi, ki la don 5 ngut ki Volunteer kiba la ïashim bynta ha kane ka awareness campaign. Kine kiba treimonsngewbha ne ki volunteer ki la sam ïa ki kot bad ïarap ïa ki pulit pynïaid kali ha Khyndailad police point bad Polo.
La ong ba kane kadei ka lad kaba bha na ka bynta ki samla kiba la trei monsngewbha kiba la shim bynta ha kane ka prokram kaba kyrpang ban pynïaid ïa ki kali bad na ka bynta kito kiba la wan ban ïashim bynta ban long kum ki volunteer ha kine ki 4 sngi ki ban dang wan bad ba kan long ka kam kaba khraw haba ki ïoh mad ïa kane ka kam.
