Shillong, K’Lyngkot, 10: U Myntri Rangbah ka Jylla, Conrad K Sangma ha ka sngi Thohdieng u la kyntait ïa ki khubor hamasaïa kiba phriang kiba kynnoh ba ka sorkar jylla ka thmu ban pynkylla noh ïa ka Land Transfer Act da kaba wanrah ïa ka Investments Meghalaya Agency IMA).
Haba kren bad ki lad pathai khubor hadien ka jingïalang jong ka Kynhun Myntri ha Sohra, u Myntri Rangbah Conrad K Sangma u la ong, “Ka jingkylli kam mih satia ba yn pynkylla noh ïa ka Land Transfer Act ne ïaid lait ïa ki bor shnong lane ïa ki District Council.”
Shuh shuh u ong ba ka IMA kadei ka agency jong ka sorkar thik kumba long lang kiwei ki agency kimnka MIDC ne MeECL kiba dei ki bor treikam jong ka sorkar. Nangta u ong ruh ba lyngba ka IMA ki kynhun ne kito kiba kwah seng kam ha ka jylla ki lah ban pan jaka na ka bynta ban seng kum ïa ki jaka pule, ki hospital bad kiwei kiwei.
“Ka IMA kadei tang ka rynsan ban pynsuk ïa kito kiba kwah ban seng kam ki lah ban wan ha kawei ka jaka.Hynrei na bynta ki jingbit ba ki dei ban ïoh kum na ki District Council bad kiwei kiwei ki hap beit ban leh,” u la bynrap biang.
Nangta u ong ruh ba ka kamram jong ka IMA ka long beit ban thied jaka bad ai pat sha kito ki nongseng kam kiba wan sha ka jylla.
“Ka long ka bakla ban ong ba ka sorkar ka thmu ban pynkylla ïa ka Land Transfer Act bad ka jingkylli kam mih hi ruh ban ong ba yn sa ïaid lait noh ïa ki District Council lane ba kita ki kynhun shimet kin lah ban wan thied jaka hi dalade,” bynrap biang u Myntri Rangbah.
Nangta u ong ruh ba naduh ka sngi kaba nyngkong ka sorkar ka la kren shai ba ka IMA ka dei na ka bynta ban thied jaka bad pynlang bad nangta sa ai pat sha ki nongwan seng kam.
Ha kajuh ka por u Myntri Rangbah u ong ruh ba kum ka sorkar ka kloi ban pynshai sha ki paidbah kiba kwah ban shai khambha shuh shuh halor kane ka bynta.
