Ym shym pynbor ïa ki college ban pynïasoh bad ka Capt Williamson Sangma State University: CM
Mynshwa ngi lait na ka CUET ba ngim don ïa ka State University
Shillong, K’Lyngkot, 10: U Myntri Rangbah ka Jylla Conrad K Sangma ha ka sngi Thohdieng u la ong ba u kwah ban pynshai hadien ba ki la don bun bha kiba kylli ba ki don ki college kiba ïoh pdiang ïa ki shithi la ki kwah neem ban pynïasoh (affiliate) bad ka Captain Williamson Sangma State University.
“Nga kwah ban pynshai sha ki college bad sha ki paidbah baroh ba baroh ki college ki don la ka jong ka mon ban jied la ki kwah ban pynïasoh bad ka skulbah NEHU ne bad ka USTM lane bad ka Williamson Sangma State University,” u la ong haba kren bad ki lad pathai khubor ha Sohra.
Nangta, u ong ruh ba ki College ki lah ban pynïasoh bad kino kino ki University kiba la ïoh jingithuh bad kam shym la don ruh ka jingpynbor ïa no ïano ban pynïasoh bad ka Captain Williamson Sangma State University.
Shuh shuh u ong ba mynta ki ailad ïa ki college ba kin jied bad no ki kwah ban pynïasoh. “Tangba lada phi pynïasoh bad ka Captain Williamson Sangma State University, ka ban myntoi eh kadei ba kin ïoh ban treilang bad ka jylla, ka sorkar jylla bad ym dei shuh bad ka sorkar pdeng haba ïadei bad ki jingdonkam bapher bapher. U ong ba kane ka dei ka sienjam kaba kham suk bad kan pynsuk bha ruh.
Nangta, u Myntri Rangbah u la ong ruh ba na bynta ki college kiba dang bteng bad pynïasoh bad ka skulbah NEHU, na ka liang ki samla pule kiba leit ha kitei ki college kiba pynïasoh bad ka NEHU ki hap ban pyndep ïa ka eksam CUET.
“Kumta naduh u snem ban wan haba ka jingrung klas ka la sdang, lada kano kano ka college kaba pynïasoh bad ka NEHU bad lada ki samla pule ki wan ban kyrpad ïa nga ban pyllait ïa ki na ka CUET ngan ym lah shuh namar mynshwa ngi la lait na ka CUET tang namarba ngim pat don ïa ka State University,” u la bynrap shuh shuh.
U Myntri Rangbah u la ïathuh ba u la dep thoh ruh sha ki college ba lada ki kwah ban pynïasoh bad ka Captain Williamson Sangma State University ki lah ban leh ïa kata bad lada ki kwah ban neh bad ka NEHU ki lah ban bteng bad ba kam don satia ka kano kano ka jingpynbor.