Nalor ki kam pynroi phaikhmat u MLA ka 19 South Shillong ban kyntiew ïa ka Sports

Shillong, Kyllalyngkot 11: Hadien ki kam pynroi kiba bun hapoh ki shnong ki thaw kiba hap hapoh ka 19 South Shillong Constituency, u Bah Sanbor Shullai – MLA ka thaiñ uba dei ruh ha kajuh ka por u Chairman ka Meghalaya Tourism Development Council, mynta ka kynti u la phaikhmat kyrpang ban kyntiew ïa ki khun samla jong ka thaiñ ha ki kam ïalehkai.
Ha ka sngi Saitjaiñ u Bah Sanbor Shullai u la plie paidbah ïa u maw nongrim ban tei ïa ka madan football ha Laban kaba yn sa siang da u phlang plastik lane Artificial Turf kum ka jingai sngewbha snem thymmai sha ki paidbah ka constituency.
Ha kaba ïadei bad ka jingmang pisa na bynta katei ka madan, kan kot haduh T 5,26, 35, 000 tyngka, ïa kaba la ïoh lyngba ka Directorate of Sport bad kumjuh ruh na ka State Sport Council jong ka sorkar jylla.
Kane ka madan ha Madan Laban ka long katkum ka standard size bad yn shna ïa kane ha kiba bun ki bynta ba kynthup naduh ki nala, ki jaka khreh bad ki jaka shong thait bad kumjuh ruh ka ophis bad ki jaka kilan met.
Haba kren ha ka jingïalang u Bah Sanbor Shullai u la ïathuh ba hadien ba la duh noh ïa ka madan Garrison Ground ka Sport Club kala hiar bha ha ka kam ïalehkai football bad lyngba kane ka madan la khmih lynti ba kan kyntiew biang sa shisien ïa ka nam jong ka sport club jong ka Laban.
Shuh shuh u Bah Sanbor u la pynbna ba ïa kane ka madan Laban yn aiti ha ki dorbar shnong, seng kynthei bad seng samla ba kin peit kin khmih ïa kane ka madan khnang ban lait na ka jingshah pyndonkam bakla ha ki khynnah kiba la ngop ha ki jingdih ba sniew. Na ka liang jong ka Dorbar Shnong Madan Laban kum ka jingsngew nguh kala ai sngewbha sha ki ophisar jong ka tnad Sport da ki jingai sngewbha ban sah kynmaw halor ka jingleh bha ïa ka shnong.