Shillong, K’Lyngkot 09 : U Symbud Myntri Rangbah ka Jylla, Bah Sniawbhalang Dhar ha ka sngi Balang u la ong ba ka Regional Committee jong ka West Jaintia Hills ka dang ap ïa ka kaiphod na ki Deputy Commissioner haba ïadei bad ki shnong kiba hap ha ka Block – I.
“Ngi la ai por ïa ki DC ba kin pynkhreh sa kawei ka kaipod kaba ngi kwah hapoh ki shibnai ne ar bnai,” ong u Bah Sniawbhalang haba kren bad ki lad pathai khubor.
Shuh shuh u ong ruh ba ïa kane ka kaiphod ki sa rah pat ha ka sorkar jylla bad hadien kane ki ar tylli ki sorkar (sorkar Meghalaya bad sorkar Assam) kin sa shim pat ïa ka rai halor kane.
Haba jubab halor ka jingkylli, u Symbud Myntri Rangbah u la kubur ba ki don ki jingeh ban pynbeit ïa ki hynriew tylli ki jaka kajia pud kiba dang sah teng ban pynbeit hapoh ka kylla kaba ar jong ka jingkren pynbeit pud bad ka sorkar Assam.
“Kane kadei ka kam kaba ïai bteng namar kane ka la sahteng mynta la 50 – 52 snem kumta ha kine ki san snem ba la dep ngi la pyrshang bad trei borbah bad ngi la pyrshang ban pynbeit. Kata kadei ka thong bahakhmat jong ka sorkar bad ngi kwah ruh ban pynbeit noh mardor,” u la ong.
Na ka liang u Symbud Myntri Rangbah u la ong ruh ba na ka sorkar Assam ki la ai ka jingïatrei lang bad ka Commitee halor kane ka ishu.
“Ngi don ka jingïatrei lang para mangi (bad ka sorkar Assam) hynrei namar ba kadei ka ishu kaba kham kyllaiñ kumta lah ban don ki jingjia hangne hangtai tangba ngi don pat ka jingïatrei lang,” u la ong.
