Ban pynkut ïa ki kynrum kynram ha NEHU yn ïakynduh u CS ïa u Secretary ka Sorkar India

Shillong, K’lyngkot, 07: U Chief Secretary jong ka Jylla u Bah DP Wahlang shen un sa leit ban ïakynduh ïa u Secretary bad ïa u Additional Aecretary in-charge Higher Education, ka Sorkar India ha ka 13 tarik mynta u bnai, ban pynkut noh ïa ki kynrum kynram hapoh ka skulbah North Eastern Hill University (NEHU).
“Nga la ïakren bad u Secretary, ka Sorkar India bad kumjuh ruh ïa u Additional Secretary. Ha ka jingshisha, ngan sa ïakynduh ïa u Secretary ha ka 13 tarik mynta u bnai ban batai bniah ïa kaei kaba la jia namarba u dang shu shimti kum u Secretary jong ka Higher Education. Ngan sa ïakynduh ïa u bad ngan sa ai jingmut ruh kaei kaba dei ban leh na ka bynta ka NEHU bad nga kyrmen ba ngin sa ïohi kaei ka ban mih na kata.”
Ka Ministry of Education ka la thaw ïa ka komiti kaba arngut ki dkhot ban tohkit halor ka jingkynnoh ba ka don ka jingkynnoh leh bymhok bad ka jingbym lah treikam hapoh ka skulbah NEHU kaba lam sha ka jingïakhih ba la lamkhmat da ka NEHUSU bad ka KSU ban dawa weng kam mardor ïa u Vice Chancellor Prof PS Shukla.
Haba kylli, u Chief Secretary u la ong, “halor ka shongsuk shongsaiñ, ka dei ka kamram jong ngi ban pynthikna ba ka shongsuk shongsaiñ kan long kaba ïaid beit bad ba kam dei ban don kano kano ka jingpynkheiñ aiñ bad ha kaba ïadei bad ki kam jong ka skulbah, namarba ka dei ka skulbah jong ka Sorkar Pdeng, ngi hap ban phikir bha, kam dei ka skulbah jong ka Jylla, ngim lah ban shim rai ha ka kyrteng jong ka NEHU.”
U la ïathuh ba ki arngut ki dkhot jong ka komiti tohkit ki ladep aiti ruh ïa ka kaiphod sha ka Ministry.
“Ïa ka kaiphod ladep bishar ruh da ka Ministry bad kaei ka rai kaba kin shim ym shym la pyntip eiei ïa ngi,” u la bynrap.
Shuh shuh u Bah Wahlang u la ong, “ngi don katto katne ki mat ban ïathir ïatai bad ngi kyrmen ba kine ki mat ïakren kin lam sha ka jingïapynbeit ïa ki kynrum kynram hapoh ka skulbah NEHU.”