Shillong, K’ Lyngkot 07: Ka khubor ba la ïoh na ki pulit la ïathuh ba ha ka janmied jong ka 4 tarik mynta u bnai, ki nongshong shnong jong ka shnong Laitumsaw kaba dang hab hapoh ka Dangar OP (EKH) ki la ïoh bat ïa uwei u briew uba kyrteng u Silvester Lartang ba la 28 snem ka rta bad arngut ki longkmie kiba kyteng ka Balbina Marak ba la 28 snem bad ka Merila A Sangma ba la 35 snem ka rta halor ka jingkynnoh ba ki donkti ha ki kam tuh ïa ki jingri bad na ki la lap ruh kawei ka masi kaba ki la buh najan jong kawei ka khlaw.
Ha kawei pat ka jingjia, ki pulit ha ka 5 tarik mynta u bnai ha ka por kumba 3.20 baje mynstep, ki pulit ki la ïoh jingtip ba 3 ngut ki briew kiba kyrteng da u Leki Khongwir ba la 27 snem ka rta, u Anand Singh ba la 34 snem ka rta bad u Albert Jyrwa ba la 26 snem ka rta ha kaba ki la buaid, ha kaba la kynnoh ba ki la hylla ha Hotel Polo Orchid, Sohra (EKH).
Halor kane ki pulit ki la bat noh ïa ki bad ki la phah sha ki jaka sumar ban phah khmih bniah ïa ka jinglong ka met ka phad jong ki.
Shuh shuh ha kawei pat ka jingjia kawei ka nongshong shnong kaba ha Shillong ka la phah ka jingujor ba ha ka 3 tarik mynta u bnai, uwei u briew uba la pynithuh ïalade kum u Raju u la pyntip ïa ka ba ka pisa kumba T. 25,000/- la kum phah bakla hapoh ka Bank account jong ka lyngba ka GPay bad u la kyrpad ïa ka ba kan phah kylla noh ïa katei ka pisa.
Kham hadien kane kaba la ujor ka la shem ba ka pisa T. 35,000/- la dep shah sei napoh ka Bank account jong ka, khlem ka jingtip jong ka.
