Shillong, Kyllalyngkot 07:Ka kynhun ïalehkai kriket U-23 jong ka Meghalaya mynta ka sngi Balang kan hap ban aireng pyrshah ïa ka kynhun ïalehkai jong ka Gujarat ha ka lympung ïalehkai U-23 Women’s T20 Trophy 2024-25 kaban long ha nongbah Guwahati.
Ha ka jingïakhun kaba long ha kane ka sngi Nyng-kong, ka Meghalaya kaba la khmihlynti ïa ka jingjop hynrei ka la shah rem noh da tang 2 ron ha ka jingïakhun pyrshah ïa ka Jammu and Kashmir ha Jagiroad, Assam.
Ka J&K ka la ïoh ban kamai 95 ron bad hap 6 wiket naki 20 over ba la mang hadien ba tied nyngkong, hynrei ka Meghalaya ka la shah khang-lad noh da tang 93 ron bad hap 7 wiket na ki 20 over ba la buh.
Haba phai sha ka rukom kamai ron, ki thei ka Meghalaya ka la hap ar wiket tang ha ka over kaba nyngkong hynrei da ka jingneh slem jong ka Rubi Chettri bad ka Ankita Sharma ki la lah ban kamai lang 49 ron shuwa ban khyllem ka wiket ba lai.
Ka Ankita ka la shah pynhap noh hadien ba tied 11 ron naki 26 bol, katba ka Rubi ka la kamai 28 ron na ki 59 bol kumjuh ka Mansi Anand ka la ïoh ban kamai stet 18 ron na ki 17 bol. Kine ki la kylla long ki nongkamai ron kiba kham radbah na bynta ka jylla ha kane ka sngi watla ki khyllem noh khlem lah ban pynjop ïa ka kynhun.
Haba phaidien, ka jingïalehkai kaba nyngkong ha ka sngi U Blei, ka Meghalaya ka la shah rem ha ka Jharkhand da 9 wiket.
