Agartala, Nohprah, 22: U Myntri ka Sorkar Pdeng uba khmih ïa ka tnat Kam Pohiing Amit Shah u la khot bad wer ban pyllait luid ïa ka thaiñ Shatei Lammihngi jong ka ri India na u drok, da kaba kyntu ban pyrkhing da ki kyndon bad da ka jingïatreilang bad ki bor synshar shnong. Ka Sorkar ka angnud ban ïakhun thma pyrshah ïa u drok.
U Amit Shah u la kyntu ïa ki jylla jong ka thaiñ Shatei Lammihngi ban nang pynjur ïa ka jingtrei shitom ban ïakhun pyrshah ïa ka jingpynïaid iew ïa u drok bad ïa ka jingkyrni jong ki briew ha u drok, khnang ban pyllait luid ïa kane ka thaiñ baroh kawei na u drok.
Haba kren ha ka 72nd Plenary jong ka North Eastern Council (NEC) ha Agartala, u Shah u la ong shuh shuh, “ha ki khyndiat snem ba la leit noh, kane ka thaiñ ka la paw kum ka khyrdop ba kongsan bad ka jaka pdeng kaba bun tam ki briew kiba la im kyrni bad ban pyndonkam ïa u drok.”
U la kdew ba watla ka don ka jingkiew artet ha kine ki hynriew snem ba ladep, hynrei ki dang don ki kam kiba dang sah ban leh.
“Ka jingstet jong ngi kam pat biang. Nga kyrpad ïa ki Myntri Rangbah, ïa ki Lat bad ki nongshong shnong jong ka thaiñ Shatei Lammihngi ba kin ym shongthait ban pynlong ïa ka thaiñ kaba laitluid na u drok. Ngi dei ban ïatreilang baroh ban pynduh ïa kane ka pop; ka thaiñ Shatei Lammihngi baroh kawei ka hap ban ïoh ïa ka jinglaitluid na ki jingdih buaid ha ka por kaba lyngkot tam. Ka thong hi ka long ban pynlong ïa ka ri India baroh kawei kaba laitluid na ki jingdih buaid.”
U Shah u la pynksan ïa ka rukom treikam ba bun rukom jong ka Sorkar na ka bynta ka jingïada bad ka roi ka par ha ka thaiñ Shatei Lammihngi.
U la kdew ba ki jingjia thombor ki la hiar da 31% bad ka jingïap jong ki riew paidbah da 86% ha kine ki phew snem ba la dep.
Shuh shuh, 10,574 ngut ki lehnoh ki la wan pyndem wait bad kane kaba pyni ïa ka jingjop jong ki buit treikam ba la buh jingmut jong ka Sorkar na ka bynta kawei pa kawei ka jylla.
“Ngi la nang jam shaphrang ha kine ki 10 snem ba ladep da kaba shna ïa ka buit treikam kaba kyrpang na ka bynta kawei pa kawei ka jylla,” u la ong.
