Ban rben ki khlaw ki btap khreh ka Sorkar ban pynbun ki ‘law kyntang

Shillong,Jylliew 8 : U Myntri ba dei peit ïa ki khlaw ki btap (Forest and Environment) u James P.K Sangma ula ïathuh ba ka sorkar shen kan sa pynmih ka jingpynbna ban pynlong noh ïa ka Baghmara Reserve Forest, South Garo Hills kum ka kper jong ki syntiew rakot ( Pitcher Plant) bad kumjuh ruh ia ka Riat Khwan Reserve Forest, East Khasi Hills kum ka jaka sah jong ki lai phewjait ki sim. ïa kane la shim rai ha ka jingïalang jongka State Board for Wildlife hapoh ka jingpynïaid u Myntri Rangbah u Conrad K Sangma.
Nalor kane ula ïathuh ruh ba ka tnad jongu ka dang pynkhreh mynta ban pynbun ïa ki ‘law shnong ki law kyntang khnang ban wanrah ka jingrben biang ki khlaw ki btap ha kane ka jylla.
U la ïathuh kumba long mynta ka jingrben ki khlaw ki btap ha ka jylla ka la duna bha. “ Kumta na ka liang ka tnad ba peit ïa ki khlaw ki btap ka shem ba kane ka dei ka jingma kaba ap ïa ka jylla bad donkam ban syndong sopti syndong patlun noh ban ïeng bad trei shitom da baroh ki ophisar ban tem ïa kine ki jingsdang syllen ki khlaw ki btap bad kumjuh ruh kumno ban thaw ki lad ki lynti ban wanrah biang ïa ka jingrben ki khlaw ki btap ha kane ka jylla” ong u James Sangma.
Kumba long mynta ki don 81 tylli ki law shnong law kyntang haka jylla bad lyngba kine ki la wanrah bun ki jingmyntoi namar la sumar ïaki da ki shnong ki thaw hi kumta ka donkam bha ban don bun kum kine ki khlaw haka jylla. Na ka bynta ka jingsumar sukher ïa ki khlaw ki btap ka sorkar kan sa ai bainong hi ïa ki shnong ki thaw, ong u myntri.
U la ïathuh ruh ba ka sorkar ka la buh thong ban thung haduh 8 million tynrai ki dieng hapoh une u snem.