Beiñ u MDC ka NPP ïa ki MDC na kiwei ki party ba kren laplah halor ka ishu pynbeit pud
Husiar, ngi dang ailad mynta ba phin ïalam ïa ka EC
Shillong, Jylliew 08: U MDC ka NPP na Rambrai, Bah Bajop Pyngrope u la ong ba kito ki MDC kiba khyrwit bad diang bad mon ïa ka NPP halor ka ishu pynbeit pud ha ka kylla kaba nyngkong, ba ki dei ban da leh ‘homework’ ha shwa ba kin kynthoh bad kren laplah kat shaba lap.
Katei ka jingkren jong u, kadei halor ka jingkynthoh jong ki katto katne ki MDC ka UDP kiba la kynnoh ba nyngkong ki MDC ka NPP ruh ki la mynjur ban ujor lang sha Ïing Bishar halor ka jingsoi jong ka sorkar MDA ïa ka soskular pynbeit pud, hynrei hadien pat ki la weng noh ïa ka jingkyrshan.
Haba pynshai shuh shuh, u Bah Bajop u la ong ba ym dei satia ba ka NPP ka la kynran dien noh ban ujor sha Ïing Bishar halor ka soskular pynbeit pud hynrei kadei namar katkum ka rai jingïalang ka long ban ailad ïa ki Hima kiba don ki kot ki sla ban ïaid shakhmat ïa ka kam.
“Ngi na ka liang ki MDC ka NPP ngim shym la pyrshah satia hynrei ngi la rai ba ngin ym leit satia sha Ïing Bishar lyngba ka District Council namar ka Council kam don ïa ki kot ki sla hynrei ki Hima ki don ïa ki. Ïa kane ruh la rai da baroh ki MDC kiba donlang ha katei ka jingïalang,” la bynrap biang u Bah Bajop.
Utei u nongmihkhmat u ong ruh ba ki para MDC ki dei ruh ban tip ba lada phai shwa tang sha ka Regional Committee kaba dei ha West Khasi Hills, ïa ka kynhun la khlieh da u MLA ka HSPDP ba dei ruh u Myntri ka sorkar jylla, Bah Renikton Tongkhar kum u Chairman katba u MLA ka UDP bad Myntri sorkar ka jylla Bah HB Nongsiej pat kum u Vice Chairman.
“Ka West Khasi Hills lei lei ka ïohnong bha na ka jingpynbeit pud ha ka kylla kaba nyngkong namar ka Tarabari Sector ha ki por ba mynshwa kam hap satia ha Meghalaya hynrei mynta kane ka jaka kaba don kumba 12 ne 13 shnong ka la hap mynta sha Meghalaya namar ka jingbit jingbiang ka synshar khadar,” u la ong.
Nalorkata, u ong ruh ba ha ka MDC constituency jong u, um shym la duh wat tang kawei ka shnong ruh.
Katkum ka jingong jong u, ka surok PMGSY na Athiabari sha Umshek Assam kam shym la ïoh satia ban sdang hynrei naduh ba u kren bad u Myntri Rangbah ka Jylla, u Conrad Sangma mardor katei ka kam ka la ïaid.