Nongpoh, Nohprah 14: Ka PA Sangma International Medical College bad Hospital (PIMCH) kaba don ha ka skulbah University of Science and Technology (USTM) Baridua, Khanapara, ka la jam sha uwei pat u mawjam jong ka jingjop, ha kaba kane ka PIMCH ka la ïoh ba rung sha ka thup ka jingithuh da ka sorkar kmie lyngba ka skhim Ayushman Bharat Pradhan Mantri Jan Arogya Yojana (AB-PMJAY). Kane ka jingithuh ïa kane ka jaka ai jingsumar bad ka jaka pule na ka bynta ki Doctor la sdang ban ithuh ïa ka naduh ka 13 tarik Nohprah, 2024.
Katkum ka shithi na ka National Health Authority jong ka Sorkar India, ka la pynthikna ba “hadien ba la bishar bniah katkum ki kyndon treikam ba kan long kum ka jaka ai jingsumar ba la ithuh da ka sorkar, la ai ka jingpynithuh ïa ka PIMCH ba kan hap ha ka thup ka AB PM-JAY.
Hadien ba la ïoh ïa ka jingithuh, ka kynhun na ka State Health Agency Meghalaya ka la pynlong ïa ka jinghikai ba bniah ha PIMC, ha ka University of Science and Technology Meghalaya (USTM). Ha kane ka prokram ai jinghikai la pynshai bniah halor kata ka Beneficiary Identification System (BIS), Transaction Management System (TMS), ki kot ki sla k iba ïa dei bad ka jaka ai jingsumar, bad kiwei kiwei ki bynta kina hap hapoh ka skhim AB PM-JAY.
Ha kane ka prokram ai jinghikai naduh ki Doctor, ki Nurse bad ki nongtrei katei ka PIMCH ki la shim bynta ha kane ka prokram ai jinghikai ban ïoh jingtip kaba bniah ban pyntreikam katkum katei ka skhim ba la pynmang da ka sorkar ban pyntreikam ha baroh ki jaka ai jingsumar.
Ha kane ka sngi, la soi ruh ïa ka Memorandum of Understanding (MoU) hapdeng ka PA Sangma International Medical College bad Hospital, State Nodal Agency-Meghalaya, bad ka Reliance General Insurance Company Ltd halor ka jingpyntreikam ïa ka skhim AB PM-JAY bad ka Meghalaya Health Insurance Scheme (MHIS) hapoh ka jylla.
Ka Dr. Mehjabeen Rahman, Principal Secretary ka USTM, ka la pynpaw ïa ka jingkmen ba ka PIMCH ka la ïoh rung ha ka thup ban pyntreikam ïa ka skhim MHIS bad ruh ka skhim PMJAY, kaba long ka jingailad bad ka jingïoh jingmyntoi ha ka liang ka koit ka khiah ki paidbah lyngba ka jingpyntreikam ka sorkar jylla bad ka sorkar pdeng ïa kitei ki skhim kiba ai jingïarap ïa ki paidbah ha ka pang ka shitom.
Ha kane ka prorkam ai jinghikai la don ryngkat naduh u Bah Skhemjingmut Law, IT Manager, MHIS & PMJAY; Natus Ladia, Monitoring and Control Officer, MHIS; u Bah Daniel G. Marbaniang, District Program Manager, MHIS & PMJAY; Jopskhem Lyngwa, HR Manager, MHIS; Brandon Bazeley Rymbai, IEC & Enrollment Manager; Anupam Chandra Marak, Claims Manager; Dr. Hawapaka Suting, Medical Officer, MHIS; bad Sarat Mallicee, State Project Manager, Reliance General Insurance Company Ltd.
