Shillong, Dec 13: Da ki spah ngut ki paid Hindu ki la ïashim bynta ha ka jingïaid rally ha nongbah Shillong ha ka sngi Thohdieng ban pyrshah ïa ka jingshah thombor bad ka jingshah pynïap beiñ jong ki riewngeit Hindu bad kiwei kiwei ki jaidbynriew rit paid ha ka ri Bangladesh.
Ïa ka jingïaid rally ba la pynlong da ka All-Meghalaya Citizen Conscious Forum (AMCCF) la sdang na Mawbah sha Rilbong point bad la phai biang sha Rhino point ha kaba ki nongïashim bynta ki la rah ïa ki plakad kiba la thoh ha ka ktien Khasi, Hindi bad Phareng ryngkat ka jingpyrta shla.
Ha kane, ïa ka dorkhas la phah sha u Khlieh bashipor ka Sorkar Bangladesh u Muhammad Yunus lyngba ka ophis jong ka Deputy Commissioner ka East Khasi Hills district ka Kong R.M.Kurbah da kaba kyntu ïa u ban leh da kaba tyngeh pyrshah ïa ki nongkam bymman bad ban pynsangeh noh mardor ïa ki jingthombor.
U Convenor jong ka AMCCF u Raju Paul u la ong ba ka dorkhas ba la aiti sha ka Deputy Commissioner jong ka East Khasi Hills district u la ong ba ïa kane yn sa phah sha ka Sorkar Bangladesh.
Ha ka dorkhas, ka AMCCF ka la kyntu ïa u Yunus ban pyllait noh ïa u Pujya Shri Chinamay Krishna Das jong ka kynhun ISKCON na along.
“Ngi ngeit ba phin (Yunus) shim ïa ka rai ban pynsangeh noh ïa ka jingpynkheiñ ïa ka hok longbriew manbriew pyrshah ïa ki ritpaid kiba sah ha ka ri Bangladesh bad ban shim ïa ki lad ki lynti ban ïada ïa ka jingim, bad ka hok jong ki kynthei, ki khynnah, ki riewlum, ki bym dei ki riewlum bad ki jaka mane blei,” ong ka dorkhas.
Haba kynthoh ïa ka Sorkar jong u Yunus bad ïa kiwei kiwei ki tnat treikam kiba sngap jar jar bad ki bym shym la leh eiei ban pynsangeh ïa kine ki jingjia, u Paul u la ong, “ka Sorkar kaba synshar mynta ha ka ri Bangladesh ka la khñiot bad thombor ïa ki jingïaid rally ba jai jai ba la pynlong da ki ritpaid, kiba pan jingïada pyrshah ïa kine ki jingshah thombor, kaba long ka jingleh bym hok, kaba long pyrshah ïa ka hok long briew bad ka synshar paidbah. La kem ïa u Sanyasi Pujya jong ka ISKCON u Chinmoy Krishna Das da ka Sorkar Bangladesh katba u dang ïalam ïa ka jingïakhih kaba jai jai ka dei tang ka jingbatai ba thaw hi. Hynrei ki la don ka jingshah thombor ïa ki niam ritpaid ha ka ri Bangladesh naduh ba kane ka sorkar ba mynta ka la shimti ïa ka bor synshar,” la ong u Paul.
U la bynrap ruh ba ki jingshah thombor ki dang ïai bteng hapoh kane ka sorkar ba mynta watla ki la len da ki bnai bad kne ki jingthombor ki long pyrshah ïa ki Hindu, ki Khristan bad ïa ki Buddhist kiba im ha ka ri Bangladesh.
