Shillong, Nohprah 12: Ïa ka 5th edition jong ka Winter Tales 2024 la plie mynta ka sngi da u Bah Paul Lyngdoh, u Myntri ka tnat Tourism ha ka jingïadonlang u Bah Cyril V D Diengdoh, IAS, Director ka Tourism, hapoh Ward’s Lake, Shillong. Kane ka tamasa ka dei kaba la sdang da ka tnat Tourism, ka sorkar Meghalaya, bad ba la pynlong da ka Meghalayan Age Limited bad ba la don bynta lang da ka Dak_ti Craft.
Halor ka phang, ‘Balance’, kane ka tamasa kaba 3 sngi ka buh ka thong ban pynïasoh ïa ki kam kiba jia mynta bad kiba la sdang naduh ki por mynshwa da kaba buh hakhmat ïa ka jingdonkam ban pynneh ïa ki jingdonkam haba ïadei ki kam pynneh bad ka jingïaryngkat ha ka jingim.
Kane ka tamasa ha une u snem kan long haduh ka 14 tarik mynta u bnai, 2024 ka ban pynmih ïa ki rai ki ban pynsuk hapdeng ka jingïaid shaphrang bad ka jingpynneh pynsah bad kaba pynshlur ïa ka jingaiti sha ka jingpynneh pynsah kaba hadien habud.
Haba kren ha kane ka sngi u Bah Paul Lyngdoh, myntri ka tnat Tourism u la ong, “Mynta ka sngi ngi don hangne ban rakhe ïa ka 5th edition jong ka Winter Tales 2024. Kane ka prokram ka la sdang da kaba rit. Mynta ka sngi ka la khring ïa ki artisan, artelier bad ki nongthaiñ jaiñ na baroh ki 12 tylli ki district jong ka jylla. Kane kadei kaba ngi khot ka kam phylla.”
U la pynpaw ïa ka jingïaroh ïa ka tnat Tourism bad baroh kiba la shim bynta bad kiba la donkti. U la ong ba ka jingjyrngam kiba don sawdong kadei ban ai mynsiem halor ka jingkitkhlieh halor ka tourism. U Bah Lyngdoh u la pynbna ruh ba u bnai Rymphang u snem ban wan, ka Meghalaya kan sa bynta ba ka tamasa ki nongjngohkai kaba heh tam ha jylla Gujarat, ha kaba ïa ka jylla yn sa ai ka jingithuh namar ba ka la kyntiew ïa ka green tourism.
U Myntri Sorkar bad kiwei ki heh ki haiñ ki la aiti ïa ki Go-Green Award sha ki kynhun bapher bapher kum ka jingithuh halor ki kam babha ba ki leh.
Ha ka sngi kaba nyngkong jong ka tamasa ka kynthup ïa ka prokram ha ka main stage bad ka workshop stage. Ha ka main stage, ki la don ki panel discussion halor ka phang ‘The art of balancing traditional while making space for contemporary’.
Ha kawei pat ka liang, ha ka workshop stage, ki la don ki jingpyni artist kiba la pynshitrhem ïalade da ki workshop halor ka art bad ha ka storytelling session ka la don ka jingban jur da ka project associate kaba dei halor ka Forgotten Folklore Project.
Ha kane ka sngi ka la don ruh ka jingpyllait ïa ki kot kaba dei ruh ki session jong ka Pahsyntiew: A Folktale na ka Meghalaya da ka Martin Luther Christian University (MLCU) ba la pynwandur da ka Amayda Eden Syiem bad artwork da Casper Syiem. Nangta ka kot ‘Ka Sohlyngem and other forgotten songs da H TesletPariat. Kiwei pat ki kynthup ïa ka ‘Bird Folktales of Meghalaya for Children’ bad ‘Guide to Birds of Meghalaya’. Ka la don ka jingpyni ïa ki sap da Adonijah Lyngdoh, culinary expert bad winner jong ka Season 1 ‘Hills on a Plate’.
Ha kajuh ka por ki nongrwai na ka jylla kum ka Na U Bnai, Sur Na Nongkyndong bad Da Minot ki la pynbyrnia ïa ki nongwan shim bynta ha ka por mynsngi. Katba ka sngi ka dang ïaid ki la don ki kynhun tem kiba la pynbyrnia kiba kynthup ïa ka Strait Brothers, Jamelle & the Pinefolks, Leo Boys, Jessie Lyngdoh and Wanjop Sohkhlet.
Ïa kane ka Winter Tales 2024, la ring jingmut jingangud da u Myntri Rangbah u Conrad K Sangma, ha u snem 2020 bad kane ka la kiew kum ka flagship programme kaba la rakhe halor ki jingdon ki riti dustur bapher bapher bad kumjuh ruh ban kyntiew ïa ki kam jngohkai ha kane ka jylla.
Kiwei kiba la donlang ki long u Bah Bajop Pyngrope, MDC ka Rambrai-Jyrngam, bad u Bah Robert Lyngdoh, Chief Administrative Officer, ka Meghalayan Age Limited napdeng kiwei pat.
