Khliehriat Nohprah 09: Ka M/s Nowell Gas Agency, East Jaiñtia Hills District, myn ha ka 6 tarik mynta u bnai Nohprah ka la pynlong ïa ka prokram ba kyrpang ha Khliehriat West Community Hall, ha kane ka prokram ki nongtrei jong katei ka agency ki la pyni nuksa ïa ki paidbah ïa ka rukom ban shet da ki LPG gas khnang ban lait na ki jingma.
Katei ka prokram ka dei kum ka jingïalap paidbah kaba la bthah lyngba ka Indian Oil Coorporation Ltd, kaba don ruh ïa ka phang pdeng, “Safty Cooking Practice For LPG Consumers Under the sense of duty campaign of MoPNG” bad ka ADC East Jaiñtia Hills District, ka kong J.U.Kharpuri, MCS ka la long kum ka kongsan ha katei ka sngi.
Haba kren ha ka jingïalang, ka kong J.U.Kharpuri ka la ai ka jingïaroh ïa ka M/s Nowell Gas Agency, East Jaiñtia Hills District kaba la pynlong ïa kane ka prokram kaba donkam namar lyngba kane ka prokram ki paidbah ki ïoh jingtip bad jingpynshai halor ki rukom ban pyndonkam ïa ki LPG bad haba pyndonkam ïa ki tyndong lyer ne ki cylinder gas ha ka por ba ki shet jingshet bad ha ka por ba khlem shet jingshet khnang ban lait na kano kano ka jingma bad jingmynsaw, ha kaba ïadei bad ka mariang, ka la bynrap ruh ba kane ka rukom shet jingshet kaba da ki tyndong lyer ne ki cylinder ne ki LPG ka ïarap shibun namar kane ka lait na ka jingpom pathar ïa ki dieng ki siej ban pyndonkam ha kaba shet ba tiew, ka lait na ka tdem ding kaba ktah ïa ka koit ka khiah.
Ha kaba ïadei bad ka jingpynlong ïa ka jingïakob shet jingshet, ka la ong ba lyngba kane ka rynsan kiba don sap ha kaba shet jingshet ki lah ban pyni sha ka pyrthei ba ki briew jong ka jylla ruh ki dei kiba don ka sap ha ka shet ka tiew bad ka la pynshlur ruh ban seng ïa ki kam ki jam da kaba shet jingshet ban pynlong ïa kane ka sap kum ka lad kamai ka ban pynlong ïa kito kiba don ka sap ba kin lah ban ïeng ha la ki jong ki kjat.
Kiba la ai jingkren ha katei ka sngi ki kynthup ruh ïa kong Cherry P Suchiang, ba dei trai jong katei ka M/s Nowell Gas Agency, East Jaiñtia Hills District ba la ai ïa ka jingkren pdiang burom ïa baroh, ka Manager (LPG Sales) & SLC Meghalaya, ka kong S.Mudoi, ka Lecturer jong ka Jaiñtia Eastern College Khliehriat, ka kong Syrpailin Phawa, u Bah Salanbor Kamar, uba na ka tnat pule puthi bad kiwei kiwei.
La sam ruh ïa ki prize sha kito kiba jop ha ka jingïakob shet jingshet ha kaba ka kong Embhahlang Pasleiñ, ka la rah ïa ka nam lahduh, ka kong Kheslymon Rymbai ka la wan ba ar bad u Bah Richard Shylla u la wan ba lai.
