Shillong, Nohprah, 04: Ka Seng Samla Madanrting ha ka sngi Balang ka la ujor sha ka Khasi Hills Autonomous District Council (KHADC) halor ka jingïoh thied jaka da kawei ka Nepali ha Them Basuk, Madanriting kaba long kum ka jingpynkheiñ ïa ka Meghalaya Transfer of Land (Regulation) Act, 1971.
U President jong ka Seng Samla Madanriting u samla Nelson S. Kharkongor ha ka jingïakren bad ki lad pathai khubor hadien ba ladep aiti ïa ka jingujor ha u Chief Executive Member (CEM) ka Khasi Hills Autonomous District Council (KHADC) Bah Pynïaid S. Syiem u la ong, “ngi la ïoh ïa ka jingujor na kiba bun ki briew ki bym kwah ban pynpaw kyrteng ba ka Srijana Gurung na ka jaidbynriew Nepali ka la ïoh ban thied jaka ha Thembasuk, Madanriting, East Khasi Hills District na kawei ka longkmie Khasi ba la tip kyrteng kum ka Kong Eltimai Pariat ha ka 16 tarik, Nohprah, 2006.”
“Katkum ka Meghalaya Transfer of Land (Regulation) Act, 1971 la khang pyrshah ïa ki bym dei ki Schedule Tribe jong ka jylla Meghalaya ban thied ne ban shu ai sngewbha da u Khasi sha u bym dei u Khasi hadien u snem 1972 bad ka Part II jong ka Sixth Schedule ka riti synshar ka ri India ruh ka kdew shai ba kino kino ki bym ki Schedule Tribe ba la ithuh da ka Jylla Meghalaya kim lah ban thied ne pdiang ïa kano kano ka jaka kaba hap hapoh ka jingpeit jingkhmih jong ka Khasi Hills Autonomous District Council, Jaiñtia Hills Autonomous District Council bad Garo Hills Autonomous District Council,” la pynpaw ka seng ha ka dorkhas ba la aiti sha u CEM ka KHADC.
Ka Section 3 jong ka Meghalaya Transfer of Land (Regulation) Act, 1971 ka batai shai ba kino kino ki jaka kiba hap ne tip kum ka Tribal Land, yn ym lah ban die da u ne ka Khasi, ïa kiwei pat ki jaidbynriew ki bym dei ki Schedule Tribebad lada don kano kano ka jingdie ne jingïathied da u bar jylla na ki Khasi ïa kano kano ka jaka kaba don hapoh ka Tribal Land, kata ka jingïathied ka lah ban long be-aiñ ne bym ithuh ïa kum kata ka jingïadie ïathied, la ong ka Seng Samla.
Ka Seng Samla ka la kyntu ïa u CEM jong ka KHADC ban phah tohkit mardor ïa kane ka kam bad ban ai ka jingbishar kaba khuid bad suba katkum ka Meghalaya Transfer of Land (Regulation) Act, 1971 khnang ba nangne shakhmat kan ym don shuh kano kano ka jingpynkheiñ aiñ kaba ïada ïa ka khyndew ka shyiap kaba hap hapoh ka Tribal Land bad kumjuh ruh kaba hap hapoh ka jingkhmih jong ka Khasi Hills Autonomous District Council.
“Ka Seng Samla Madanriting Pyllun ka ngeit skhem ba ka Council kan leh ïa kaba donkam katkum ka Meghalaya Transfer of Land (Regulation) Act, na ka bynta ka jingshong shngaiñ bad ka lawei ba pynthikna ïa ka jinglong trai ri trai muluk ha la ka jkaa bad na ka bynta ka bha ka miat jong ka shnong Madanriting bad ka jaidbynriew hi baroh kawei,” la bynrap ka dorkhas.
