Shillong, Naiwieng, 26: Ka Kashari Special Judge POCSO, East Jaiñtia Hills District ka la rai pynrem da kaba ai jingpynshitom ban set along 15 snem ïa u Henry ba ju khot sin Jen Pale hapoh ka Section 6 jong ka POCSO Act bad daiñ kuna T. 20,000 hajar bad sa 7 snem ban shong along namar ka jingdonkti ha ka kam bymman hapoh ka Section 506 Indian Penal Code.
U kyrwoh ba la phah da u Superintendent of Police, East Jaiñtia Hills District ula pyntip ba ïa ka case la register ha Khliehriat Police Station ha u snem 2018 hapoh ka Section 5(m)(n)/6 POCSO Act bad ïa ka jingtohkit la bynshet ha ka WPI. O. Tyngkan. Hadien ba la pyndep ïa ka jingtohkit kaba bniah la pynngat kyndon ha 31 tarik, Naitung, 2018.
Ha kawei pat ka rai, ka Kashari Judicial Magistrate First Class ka North Garo Hills ha ka 21 tarik, mynta u bnai ka la pynmih ïa ka hukum ba la rai pynrem ïa u Tapon R. Marak, halor ka jingdonkti ban thombor ïa kawei ka kynthei. Ïa u Tapon Marak la rai pynrem hapoh ka Section 354/354B/323 Indian Penal Code bad la hukum ban set along san snem kynthih kum ka jingpynshitom.
Ha u kyrwoh ba la phah da u Superintendent of Police ka North Garo Hills sha ki lad pathai khubor ha ka sngi Baar u la ïathuh ba ïa kane ka jingjia la pyntip sha ki Pulit jong ka Resubelpara Police Station ha ka 20 tarik, Rymphang, 2019 bad ki Pulit ki la register case pyrshah ïa u Tapon Marak bad pynlong ruh ka jingtohkit kaba bniah.
