Ban pynneh ïa ka shongsuk shongshngaiñ, lum jingïalang ka tnad Pulit ïa ki VDP

Jowai, Naiwieng 26: Ka ophis u Superintendent of Police ka West Jaiñtia Hills District mynta ka sngi 26 tarik u Naiwieng ka la pynlong ïa ka prokram ban ïa phylliew jingmut lang bad ki nongïalam shnong ne ka Rally of Village Defence Party (VDP), halor kumno ban wanrah ïa ka shong suk shong shngaiñ hapoh ka shnong ka thaw da ka jingïatrei lang bad ka tnad pulit.
Ïa kane ka prokram la pynlong ha District Library Auditorium Mynthong, Jowai, ha kaba ka Additional Deputy Commissioner ka WJHD ka kong B. Blah ka la long kum ka kongsan, ha ka jingdonlang u Superintendent of Police u ma Chemphang Syrti, MPS, u Additional SP (Hq) ma V.D Sangahiwot Rymbai, u Dewansh Pandey (IPS) uba dei u SDPO Amlarem, ki Officer In-Charge jong ki Police Station bapher bapher nalor kiwei de, ïa ka jingïalang la pynïaid da ka Additional SP (Crime) kong C.W. Lyngdoh (MPS).
Ki katto katne ngut ki VDP shnong ki la ïoh lad ban pynsngew ïa ki kam ba bha jong ki bad ki jingeh kiba ïa kynduh ha ka por ba ïakhun ïa ki kam sniew hapoh ka shnong ka thaw.
Ka kongsan jong kane ka sngi kong B. Blah (MCS) haba ai jingkren ka la buh ka jingkyntu ïa kitei ki VDP shnong “Haba ki trei ïa ka kam ki dei ban tip nyngkong ïa aiñ, namar ka long kaba donkam eh ban wanrah ïa ka bha ka miat jong kiba bun ba lang”.
Ka la kyntu ruh ïa ki longkmie ba kin mih shakhmat ban ïatreilang hapoh ka shnong ka thaw namar ma ki ruh ki don ka hok ban ïashim bynta lang. Da kaba ong ba ki kynthei ki kham khlaiñ bor shibun ha ka rukom treikam.
Ka ong haba ïa nujor bad ki por mynshwa ka la ïapher bak la bak ha ka liang ka jingshongsuk shong shngaiñ mynta namar ka jingdon jong ki VDP kiba trei shitom da ka mon sngewbha ban rad diengkhong ïa ki kam sniew ba bun jait.
Ha kajuh ka por ka la ai ka jingïaroh ïa ka tnad Pulit jong ka West Jaiñtia kaba la pynlong ïa kane ka prokram ïaphylliew jingmut bad ka long kaba donkam bha hapoh ka imlang ka sahlang ban wanrah jingïatreilang ki pulit bad ki VDP shnong.
U SP ka West Jaiñtia Hills u ma Chephang Syrti ula kyntu ïa ki kmie ki kpa ba kin nang ban ïalam ïa ki khun jong ki ha ka lynti kaba dei khnang ba kin lait na ki kam sniew, ula kyntu ruh ïa ki khun khun samla kiba la pynkhreh ban ïakhun ïa ka kam Pulit ba kin long kiba trei shitom khnang ba kin jop ïa ki jingïakhun (recruitment)
Ha kane ka sngi la wan ban ïashim bynta da ki spah ngut ki VDP shnong na ka District kiba kynthup ïa ki kynthei bad shynrang, na ka liang ophisar pulit kiba la ai jinghikai shaphang ki kyndon aiñ bapher bapher bad ka rukom treikam jong ki bad ha ka juh ka por ki la ai jujab ruh ïa ki jingkylli. Katba ïa ki kyntien ai khublei la ïoh da u ma F. Passah (COVDO).