Shillong, Naiwieng 25: San ngut ki dkhot jong ka Meghalaya State Karate Do Federation (MSKDF) ki la ïashimbynta ha ka rynsan ïakhun jong ka Federation Cup Premier League & Youth League -2024, kaba la sdang naduh 19 haduh 23 tarik Naiwieng. 2024 ha Talkotara Indoor Stadium, New Delhi.
ïa kane ka kynhun la ïalam da ka Kong Bajoplin Kharmudai na Madanrting East Khasi Hills kum ka Team Leader. Kane ka kynhun jong 5 ngut ki nongïalehkai ka la lah ban wanrah nam ïa ka Jylla Meghalaya da kaba jop 2 tylli ki takma rnong na katei ka rynsan.
Kine kiba la khur takma ki kynthup ïa u Salmi Phawa , u ba la khur takma rnong ha ka Kumite Event U-17- 50kg bad ka Sesilia Dkhar kaba la wan ba lai ha ka Kumite Event Cadets Female -47 kg.
ïa kane ka lympung ba la kdew haneng ba kynthup ïa ki kyrdan bapher bapher naduh ki Cadet, Junior & Senior ( Shynrang& Kynthei ) la pynlong da ka Karate India Organisation hapoh ka jingïalam ka Hanshi Bharat Sharma – President ka KIO & South Asian Karate Federation kaba dei dkhot bad ka Asian Karate Federation (AKF) & World Karate Federation (WKF) bad kiwei kiwei.
Katkum ka kyrwoh na ka MSKDF, ka long kaba donkam ban kdew hangne ba ka Meghalaya State Karate-Do Federation (MSKDF) ha Meghalaya ka dei tang ma ka ka seng Karate kaba la pynïasoh bad ka Karate India Organization (KIO) New Delhi kaba dei tang ma ka ka synjuk Karate ha India kaba la ithuh da ka World Karate Federation (WKF), Asian Karate Federation (AKF), ba kynthup ïa ka World Youth Games, Common Wealth Games bad ka IOC.
