Nongpoh, Jylliew 07: Kum ka nuksa kaba bha sha kiba bun ki paidbah ban sumar bad ban nym pyniap beaiñ ïaki mrad bad ki sim ki doh, uwei u ophisar ka District Public Relation Officer ka Ri-Bhoi u Bah B Jaraiñ hynnin ka miet u la ioh ban pynlait im ïa uwei u dkhoh bala wan ha iingsah jong u ha Nongjri bad leit aiti sha ka tnad Wildlife ha Nongpoh ba kin ioh pat ban leh ïa kaba donkam.
Katkum ka jingïathuh utei u ophisar, utei u dkhoh u la wan rung ha iing haka por janmiet ha kaba ki don ar tylli hynrei u la ioh ban kem tang ïa uwei bad set ïa u ha kawei ka ruh.
Haba kren bad utei u ophisar u la ong ba ka daw bala pynlong ïa u ban kem bad leit aiti sha ka tnad wildlife ka long ban ai mynsiem bad pynshlur ïaki paidbah bad ban long ruh ka nuksa ba bha ba ngim dei ban pyniap pathar ïaki sim ki doh, ki mrad ki mreng kiba la sdang ban duhjait na kane ka sla pyrthei, hynrei ngi dei ban nang kumno ban kiar naka jingpyniap pathar ïaki jait jingthaw ba im kiba ka mei mariang ka ai khamtam dang ha kine ki sngi la rakhe ruh ïaka sngi pynneh mariang ban pynjyrngam biang sa shisien ïaki khlaw ki btap kiba dei ka iingsah jong ki mrad bad ki sim ki doh bad naka liang ka tnad wildlife naka por shaka por ka ju pynshlur bad ai khusnam ruh sha ki paidbah kiba ju pynlait im ïaki mrad ki mreng bad ki sim ki doh.
Namarkata u la kyrpad sha ki paidbah ba ki dei ban husiar ka pyniap pathar ïaki mrad ki mreng bad ki sim ki doh, hynrei ban don ka jingmut ban pynneh pynsah ïaki khnang ba kin nym duhjait na ka sla pyrthei.
