Shillong, Naiwieng 19 : Ka Directorate of Enforcement (ED) kala pynlong ïa ka jingkhynra ha ki 22 tylli ki ïing ha Meghalaya bad 5 tylli kiwei ki Jylla halor ka jyrsieh Lottery u Santiago Martin.
Ka jingkhynra ka dei halor ka jingtohkit jong ka ED pyrshah ïa u Santiago Martin bad ka kompani jong u ka M/s Future Gaming and Hotel Services Private Limited lem bad ki paralok jong u. Saw tylli ki Printing Press kiba don bynta ha ka jingshon ïa ki lottery ticket ruh kila ngat lang ha ka jingkhynra.
Ka jingtohkit jong ka ED kala mih na ka ejahar bala ujor da ka Tnad Meghalaya Police halor ka jingujor jong u Director ka Meghalaya State Lottery. ïa kane ka case la shimti da ka CBI haba shim lang ïa ka ejahar bala ujor da ki Pulit ka Kerela.
Kiwei pat ki Jylla kiba ka jingkhynra kala jia ki kynthup ïa ka Tamil Nadu, West Bengal, Karnataka, Uttar Pradesh bad ka Punjab kaba long kat kum ka Prevention of Money Laundering Act (PMLA), 2002.
“Ka jingkynnoh kala mih ka kynthup ïa ka jingkwah pynïaid marwei ïa ka iew Lottery, ka jingdie ïa ki ticket thok, ka jingpynïaid hala ka mon ïa ka song pisa ba jop, bad jingpynkylla ïa ka pisa beaiñ (black money) sha ka pisa hok da kaba pynïaid ha ka prize jong ka ticket. Kine ki kam kila wanrah ïa ka jingduhnong kaba khraw ïa ka pla tyngka ka Jylla bad ki paidbah” ong ka ED ha ka kyrwoh.
Ka jingkhynra kala lam sha ka jingïoh kurup ïa ka pisa bym lah ban batai, kaba kot haduh T.12.41 klur, bun ki tiar digital bad ki kot ki sla kiba donkam. La kurup ruh ïa ka Bank FDR ba T.6.42 klur ha kane ka jingkhynra.
Ka ED kala shem ruh ïa shibun bah ki jingkynshew ha ki nongkynti ha Coimbatore Chennai, Mumbai, Dubai bad London bad kiwei kiwei.
Ha ka jingtohkit ba nyngong ïa kane ka kam ha ka ED, Kochi, la shem ba u Martin Santiago bad ka kompani jong u, kila ïoh lum pisa beaiñ haduh T.920 klur na ka kam lottery ha kaba haduh T.622 klur ka nongkynti la kurup noh. Ka jingtohkit ïa kane ka kam ka dang iaid shakhmat.
