Nongstoiñ, Naiwieng, 17: Ka Federation of Khasi Jaiñtia & Garo People West Khasi Hills ka la ïoh ban pynthymmai ïa ki nongkitkam na ka bynta ka samoi treikam jong u snem 2024 haduh 2027.
Ka jingpynthymmai ïa ki nongkitkam ka long katkum ka riti pynïaid kam jong ka seng, kaba la buh ryntih ba ka samoi treikam jong baroh ki nongkitkam naduh ka sengkmie haduh ki district, circle bad ki unit ka dei ban long tang lai snem. Kumta hadien ba ka samoi treikam jong ki nongkitkam jong ka West Khasi hills district unit kiba dei na ka bynta jong u snem 2021 haduh 2024 ka la kut ka seng ka la hap ban pynthymmai biang. Hadien ba ka seng ka la dep ban jied ïa baroh ki nonghkitkam ha ka sngi saitjaiñ ba la dep ka la pynlong ïa ka jingïalang ban pynskhem ïa kiteiki nongkitkam ha St Vanni’s hall kaba don ha St Peters Pyndengrei.
Ha katei ka sngi ki nongïalam ka seng kmie naduh u bah Dundee Clift Khongsit President, bah Eldie Newton Lyngdoh Secretary, bah Kitbok Nongphlang, ki nongïalam na Ribhoi District, South West Khasi Hills bad kiwei kiwei ki la ïadon ryngkat.
Nalor kata ha katei ka sngi ki nongïalam jong kiwei pat ki sengbhalang kum ka Hynñiewtrep National Youth Front bad Khasi Student Union kiba ju ïatreilang bad ka FKJGP ha ki por baroh ki la wan ban ïadon ryngkat bad ban ai mynsiem ïa ki nongkitkam ba thymmai ka FKJGP.
Ha shuwa ban pynskhem bad pynbam smai ïa ki nongkitkam ba thymmai, la ïoh ban pynkup burom ïa ki dkhot jong ka seng, kiba la ju don bynta ha kaba noh synñiang da ka snam sha kito ki ba pang ba shitom kiba dei na ki long ïing long sem kiba duk kiba shah sumar ha ki hospital bad kiba don kam ïa ka snam hynrei kim ïoh lad pat ban shu thied.
Ha kajuh ka por la pynkup burom ruh ïa ki nongkitkam kiba rim kiba la shongthait hynrei kiba dang ïadon bynta bad ka seng ha kiba bun ki kam ban shakri ïa ka ri bad ka jaitbynriew.
Ha katei ka sngi la ïoh ruh ïa ka jingkren na u bah Dundee Cliff Khongsit president ka sengkmie, bah Eldie Newton Lyngdoh bad kiwei kiwei. U bah Khongsit kum u nongïalam ba hakhmat duh jong ka seng kmie u la kyntu kynpham ïa ki nongkitkam ba thymmai ba, haba ki la shah jied kum ki nongïalam, ki dei ban don ka jingïalong shi tylli.
Shuwa ba kin leh ïa kano kano ka kam ki dei ban ïoh ïa ka jingmynjur lang da baroh ki para nongkitkam bad ki dkhot ym ba kin shu leh don bor ne rai marwei namar lada ka jingïatylli kam don ka seng kan ym kiew lano lano ruh.
Nalor kata u la ong ruh ba ki nongïalam bad ki dkhot ka FKJGP West Khasi Hills ki dei ban sngew sarong ba ki khlawait ka ri kum u Syierm Tirot Sing, u Wiskliffe Syiem ki dei kiba ka West Khasi hills ka la pynmih. Kumta kum ki nongïalam bad ki dkhot ka seng ki ban don ka mysiem shynrang bad haba ki ïakynduh kino kino ki jingeh kim dei ban kynrandien hynrei kin ïengskhem ha ka nongrim jong ka hok bad ka jingshisha.
U la pynkynmaw ruh ba bun bah ki sengbhalang ki mih na ka por sha ka por hynrei don ruh kiba shu jah rngai khlem lap dien trai shuh. Nangta u la ong ruh ba ki do katto katne ki sengbhalang kiba leh ïa ki kam kiba pynjah burom ïa ka imlang sahlang tang na ka bynta ka jingmyntoi jong ki. Kumta u la kyntu bad pynshai ruh ba ka FKJGP kam shah ïano ïano kiba don ha ka seng ba kin leh ïa kino kino ki kam kiba pynjah burom bad pynthohbria ïa ki shnong ki thaw bad ka imlang sahlang.
La pynskhem ïa ki nongkitkam ba thymmai jong ka FKJGP West Khasi Hills District da u president ka FKJGP sengkmie, ha kaba ki nongkitkam ba thymmai na ka bynta u snem 2024 haduh 2027 ki long president bah Pynshai Kharbani, Vice president bah Carry Oscar Kharmuti bad bah Serbilin Lyngdoh, General Secretary bah Willis Syiem, Assistant GS bah Nicky Marweiñ bad bah Jistarland Lyngkhoi, Chief Organising secretary Eveningstar Marthong, organizing secretary bah Brostar Tyrsa, bah Shanbor Nongphud, bah Tipsuk Thongni, bah Ariferius Diengan, bah Ioanis Ïawlar, bah Banteilang Kharlait bad Firstborn Marngar lem kiwei kiwei de ki nongkitkam ha ki tnad bapher bapher.
