Shillong, Naiwieng 15: U Myntri Sorkar Pdeng ba dei khmih ïa ka tnad Civil Aviation, Rammohan Naidu Kinjarapu, u la ïashim bynta ha ka jingrakhe ïa ka Janjatiya Gaurav Diwasha ka sngi kaba ar ba u don ha nongbah Shillong mynta ka sngi. Ïa kane ka prokram la pynlong da ka State Rural Employment Society bad ka tnad C&RD, ha State Convention Center ha Shillong.
Ha kane ka sngi la wan ïashim bynta lang u Myntri Rangbah ka jylla Meghalaya, Conrad Sangma, ki nongïalam riewlum, ki kynrem ki lyndan na ka jaitbynriew Khasi, Garo bad Jaiñtia.
Ha ka jingai jingkren, u Myntri Sorkar Pdeng u la ong ba u sngewnguh ban ïoh ban rakhe ïa ka bynta kaba saw jong ka Janjatiya Gaurav Diwasha Meghalaya. “Kane ka dei ka sngi ai burom ïa ka kam bakhraw jong u Birsa Munda, u riewlum ba la ïakhun na ka bynta ka jinglaitluid ka ri, bad ki jinglen lade jong u ki bteng ban ai mynsiem ha ka jingïakhun na ka bynta ka hok, ka jingïaryngkat kyrdan bad ka jingïada ïa ka jinglong bad ka deiriti riewlum,” u la ong. U Myntri u la ai jingsngewnguh ïa ka jingshlur jong ki riewlum kiba la lenlade ban tei ïa ka lynti jong ka ri sha ka jinglaitluid bad kiba la trei borbah ban pynneh ïa ka mariang bad ka deiriti.
“Ha Shillong, hapdeng ki Khasi, Garo, bad Jaiñtia-nga kmen ban ïohi ïa ka jingpynneh bad ka jingkyntiew ïa ka deiriti riewlum. Dang shen nga la wan sha ka Khasi Heritage Village bad nga la itynnad bha ïa ka jingïeng skhem ban pynneh ïa ki ‘law kyntang bad ka mariang, ka jinglong kaba la hiar bun pateng. “Ka jingïada ïa ka mariang ka dei ka jingngeit kaba kongsan ba ki riewlum ki la ai pateng bad ka don ka jinghikai kaba kongsan ïa baroh ki briew.”
U Myntri u la kdew ruh ïa ka jingïaid shaphrang hapoh ka jingïalam u Myntri Rangbah Duh, Narendra Modi bad u Myntri Rangbah Conrad Sangma, khamtam ha ka jingpynbiang ïa ki jingdon jingem, ka pule puthi bad ki lad ïoh jingsumar ïa ki riewlum.
U la ong ba ka Sorkar Pdeng hapoh ka jingïalam jong u Myntri Rangbah Duh Modi, ka la buh kyrpang T 70,000 klur ha ka shi snem na ka bynta ki scholarship ïa 30 lak ngut ki khynnah riewlum ba dang pule, ka la shna 1.5 klur tylli ki paiñkhana na ka bynta 58 lak tylli ki longïing riewlum hapoh ka Swachh Bharat Mission, bad ka la ai jingmyntoi ïa 1.2 klur ngut ki nongrep riewlum hapoh ka PM KisanYojana. U la ong ruh ba ka jingbei tyngka na ka bynta ka bha ka miat jong ki riewlum ka la kiew na ka T 24,600 klur ha u 2014 sha ka T 1.23 lak klur ha u 2024, kaba long ka jingkyntiew kaba san shah.
U Myntri u la ong ruh ba palat 4.6 klur ngut ki riewlum ki la shah screen na ka bynta ka jingpang sickle cell anemia, ka jingpang kaba ktah bha ïa ki riewlum. La tei ïa ki museum ban pynkupburom ïa ki nongïalam riewlum, ka deiriti bad ka jinglong tynrai jong ki bad la ai T 24, 000 klur ban kyrshan ïa 45 lak kiba ïoh jingmyntoi PVTG hapoh ka PM Jan Man Yojana. U la kren ruh shaphang ka jingbun ki skul Eklavya Model Residential, kiba pynbiang ka jingpule kaba bha ïa ki khynnah riewlum kaba la kiew na 123 tylli ha u 2014 sha 476 tylli ha kylleng ka ri kiba ai jingmyntoi ïa ki phew hajar ngut ki khynnah riewlum ba dang pule.
“Ka Sorkar ka la kyrshan ruh ïa ki nongrep bad ki nongseng kam lajong kiba dei ki riewlum, ha kaba ki mar khlaw kiba ïoh ïa ka Minimum Support Price (MSP) ki la kiew na 12 sha ka 87 tylli kaba plie ïa ki lad kamai jakpoh ba thymmai ïa ki riewlum,” la ong u Myntri.
U Myntri u la ong ba u sngew sarong ban ïadon bynta ha kane ka jingrakhe ha Meghalaya, ka jylla kaba riewspah ha ka deiriti riewlum. “Kane ka jingwan jong nga ka la ai shibun ki jinghikai ïa nga. Ngan shim ïa kine ki jinghikai ba nga la ïoh hangne bad pyndonkam ïa ki ban ai jingshakri ba kham bha ïa ki briew jong nga,” u la ong.
Ha kaba ïadei bad ka bynta jong u kum u Myntri ka Tnad Civil Aviation, u Myntri u la kdew sha ka jingdonkam ban kyntiew ïa ki lad ka leit ka wan ha ka thaiñ shatei lammihngi, khamtam ha Meghalaya. U la kular ïa ki briew ba ka Sorkar India ka la kut jingmut ban kyntiew ïa ki lad ka leit ka wan lyngba ki liengsuiñ ha kane ka thaiñ. U la kren shaphang ki jingpyrshang ka Sorkar ban kyntiew ïa ka kad liengsuiñ Shillong khnang ba ki liengsuiñ ba kham heh ki lah ban wan sha kane ka kad liengsuiñ bad kumta, ki briew nangne ki lah ban leit beit beit sha Delhi. U la kyrshan ruh ïa ka jingthmu jong u Myntri Rangbah, Conrad Sangma ban kyntiew ïa ki lad ka leit ka wan sha Tura bad kiwei kiwei ki jaka jong ka jylla kiba jynjar ban poi, ba kynthup ïa ka jingwanrah ïa ki liengsuiñ kiba lah ban pynher na ki jaka shongum.
“Ngi sngewthuh ïa ki jingeh kiba wan namar ka jinglong jong kane ka jaka, bad ngi kut jingmut ban kyntiew ïa ka Meghalaya kum kawei na ki nongïalam ha ki kam pynher liengsuiñ. Ka jingpynïar ïa ki kad liengsuiñ bad ki lad ka leit ka wan kiba kham bha kin plie ïa ki lad ka ïoh ka kot jong ki briew ka Meghalaya,” la ong u Myntri.
U Myntri Rangbah Duh, Narendra Modi u la pynsdang ïa ka jingrakhe kaba shi snem ïa ka lyngkhuh sngi kha ba 150 jong u Bhagwan Birsa Mundaha ka Janjatiya Gaurav Divas bad u la buh maw nongrim ïa ki projek bapher bapher na ka bynta ka roi ka par kiba kot sha ka T 6,640 klur ha Jamui, Bihar mynta ka sngi. Ka prokram ha Jamuika dei kaba la live stream sha kylleng ka ri ba kynthup ruh ha Shillong ha kaba la don ka jingïashim bynta ha ki distrik bapher bapher jong ka Meghalaya.
