Mawkyrwat, Jylliew 06: Ka Community Led Landscape Management Project (CLLMP) ryngkat bad ka Basin Development Unit (JICA, MLAMP, FOCUS) ryngkat ka jingïasnohkti lang jong ka District Administration & District Legal Services Authority, South West Khasi Hills District mynta ka sngi ki la ïoh ban pynkut noh ïa ka jingrakhe ïa ka taïew ba kyrpang jong ka jingpynneh pynsah ïa ka mei mariang kaba dei halor ka phang, “Tang kawei ka pyrthei – Ban ïa im ïa sah ryngkat ryngkat bad ka Mariang” lane “ban ïa neh ïa san ryngkat bad ka mei mariang.”
Ïa kane ka prokram la pynlong hapoh ka Nativity Parish Hall, South West Khasi Hills District, Mawkyrwat kaba dei hapoh ka jingïalam jong u District Project Manager (DPM), bah John K. Wanniang ha kaba ïa ka jingïalang la pynïaid da u bah Welbok Lyngdoh Tongkhar, Assistant Manager Rural Finance.
Ka kong C. Kharkongor, IAS kaba dei ka Deputy Commissioner jong ka South West Khasi Hills District ha ka jingkren jong ka kum ka kongsan ka la ong ba kumno kin pynduna ïa ki ñiut ki ñier, ki jakhlia jakhlaid, ka jingkiew ka jong ka jingshit bad jingkylla ka mariang, ka jingpynduna ha kaba pyndonkam ïa ki plastik, ka jingïada ïa ki khlaw bad pynneh pynsah ïa ki sawdong sawkun bad ban ïada khamtam eh ïa ka jingkhuid jingsuba jong ka Wahsala. Ka la kyntu namarkata, ïa ki khynnah skul ba ki dei ban sumar ïa ka mei mariang bad ïa baroh kiba don ha ka, namar ngi don tang kawei ka pyrthei bad ma ki hi ki dei ka lawei jong ka.
Ka kong Nosmi Hahshah, Panel Lawyer ka District Legal Services Authority (DLSA), South West Khasi Hills District pat ka la ai jingkren shaphang bun jait ki kyndon bad ki aiñ ba la buh da ka sorkar ha kaba ïa dei bad ki jingpynneh pynsah ïa ka mei mariang. La ïoh ruh ka jingkren na u bah N.S. Wanniang uba la wan na ka ophis jong u Soil and Water Conservation, South West Khasi Hills District ha kaba u la kren halor ka jinglap ha kaba ïa dei bad ka jingtrei bad ki kam NRM.
U bah Lancestorm Lyngdoh Tongkhar, Village Community Facilitator (Domjyrti VNRMC) uba la ai ki symboh jingkren bad ka jingkyntu ïa baroh kiba wan sha kane ka jingïalang ïa kaba kumno ban sumar bad ban pynneh ïa kane ka mariang.
U bah Bansuk Syiem, BPM JICA u la pyn i ïa ka dur ba lyngkot ne short clip kaba dei halor ka “My Mawkyrwat My Town” kaba la pyn i ïa ka jingma jong ka jingpyndonkam pathar bad ka jingbret pathar ïa ka plastik. Namarkata, u la kyntu ïa ki briew da kaba kren ha ka ktien shnong ne ktien maram kaba ong, “Da dih su hah cjiew da tama lam pla su” khnang ban lait na ka jingpyndonkam ïa ki plastik.
Ïa kane ka program la ïoh ka jingpynshngaiñ na ki dkhot jong baroh 40 tylli ki shnong kiba hap hapoh ka Community Led Landscape Management Project (CLLMP), ki nonghikai ryngkat bad ki khynnah skul kiba la ïa shimbynta shitrhem ha ka World Environment Week 2022 bad ka jingïadon lang jong ki sengbhalang bapher bapher jong ka distrik.
Ban pynshit pynshngaiñ shuh shuh ïa kane ka prokram, la ïoh ruh ka jingrwai ieid mariang na ka Thangrai VNRMC bad na ka Ïonglajong Musical & Cultural Organisation, Mawlangwir.
La ïoh ruh ban ïa pule lang ïa ka jingshimrai ne pledge ba la ïalam da ka Assistant Manager jong ka Environment Management, kong Niwancy Bareh na ka ophis Community Led Landscape Management Project (CLLMP), South West Khasi Hills District.
Ha kajuh hi ka sngi la ïoh ruh ban sam ïa ki khusnam sha ki nongjop kiba la ïa shimbynta ha ki jingïakop kum ka jingïakop dro, ïa kop thoh Ese bad ïa kop jingïakyntip ba la pynlong ha ka Environment Week. Ki program kum ka jingïathung dieng ba la ïa shimbynta da ki shnong, ki sengbhalang bapher bapher bad ki balang bapher bapher hapoh ka South West Khasi Hills District ba la pyndep hapoh kane ka taïew.
