Mawkyrwat, Risaw 31 : Ka Khasi Students Union jong ka Mawkyrwat Circle mynta ka sngi ha ka Press Conference ki la pynpaw ka jingsngewdiaw halor ka jingleh torti jong ka tnad sam bording hapoh ka dong ka thaiñ ha kaba ka jingduh ïa ki mynsiem briew ka ju jia na kawei ka por sha kawei pat.
Namarkata, u bah Rutherford Lyngdoh, President Mawkyrwat Circle haba ai jingkren u la ong pynpaw ka jingsngewkhia halor ka jingjia hynnin ka 30 tarik u Risaw, 2024 hapoh shnong Rangblang-Pombriew ha kaba uwei u samla uba kyrteng u (L) Jamewellson Thongni 19 snem u la duh ei ïa la ka jingim na ka daw jong ka jingleh torti jong ka tnad sam bording.
“Kum kane ka jingjia kam dei shuh ka sien ba nyngkong hynrei la ju sakhi ba ka la ju jia manla ka por”, ong u bah Rutherford. Kumta u la buh ka jingkyrpad ïa ka tnad sam bording ba kam dei shuh ban dang kheiñ stieng hynrei ka dei ban shimkhia khnang ba kan ym don shuh kano kano ka jingjia ba sngewsih ne duh ki mynsiem briew.
Ha kajuh ka por ka seng ka dawa ruh ïa ka tnad sam bording ba ka dei ban siew bai lut ksan ha kiba ha ïing ha sem jong u (L) Jamewellson Thongni. Ym tang kata, ka seng ka la buh por ruh ba ka MePDCL ka dei ban pynbiang ïa ki jingker ha ki jaka buh ïa ki transformer tang hapoh shi bnai lym kumta kan sa shim da kiwei pat ki synjam.
U Rutherford Lyngdoh, President ka KSU Mawkyrwat Circle u phah ruh ka kyrwoh khubor sngewlem sha kiba ha ïing ha sem jong u (L) Jamewellson Thongni ba watla ki la duh noh ïa u hynrei ai ba U Trai Kynrad na jrong Un don ryngkat lem bad ha ki por baroh bad Un pyntngen ruh ïa ka mynsiem ba sngewsih.
Kiwei de kiba la ïa donlang ki long u Plosborlin Kharjahrin, General Secretary ka KSU Mawkyrwat Circle, u John Marweiñ, President ka KSU Nobosohphoh Area Unit bad u Marvelous Kharjahrin.
