Nongpoh, Risaw 28: U Myntri ka sokar jylla ba dei peit ïa ka tnad Veterinary & Animal Husbandry, u Bah A.L Hek mynta ka sngi u la leit ban shim bynta ha ka jingrakhe dap 3 snem ka Ïakyrshan Cluster Farmer’s Producer Multipurpose Cooperative society bad ha kajuh ka por u la plie paidbah ïa ka Ginger Processing Unit ba la pynlong mynta ka sngi ha ka Shnong Tyrso.
Ha kane ka sngi la sakhi lang ruh da ka jingdon lang u MLA ka Mawhati u Bah Charles Marngar, u Bah M.K Kharmudai AGM, District Project Manager, u Bah R. Sten, Sordar ka Tyrso Pyllun, ka Kong Iohilut Lyngdoh, President ka Society, ki dkhot ka society bad kiwei kiwei ki rangbah nalor ki nongshong shnong ka tyrso.
Kum ban pynpaw, ha kane ka sngi rakhe ïa ka jingdap 3 snem ka jingïaid lynti katei ka Society, ka la long ruh ka jingkyrkhu ïa ki longkmie, ha kaba ïa katei ka Ginger Processing Unit yn peit yn khmih hi da katei ka Society bad ruh lyngba ka jingkyrshan pisa na ka Meghalaya Basin Management Agency.
Haba ai jingkren ha kane ka ngi, u Bah A.L heh u la ai jingïaroh ïa ka Ïakyrshan Cluster Farmer’s Producer Multipurpose Co-operative Society, ba dei lyngba ka jingtrei shitom kane ka Society la lah ban plie sa kane ka Ginge Processing Unit kaba long ka jingkyrkhu ïa ki nongrep katei ka thain.
“Ka Ri Bhoi District ka dei ka District kaba pynmih shibun ki mar rep bad ka jingioh ïa kum kane ka Ginge Processing Unit kan ïarap shibun eh ïa ki nongrep ba kin dang lah ban kyntiew ïa ki kam rep bad ha kajuh ka por ban kyntiew ïa ka ioh ka kot ki Nongrep,” ong u Bah A.L Hek.
Shuh shuh, ha kawei ka bynta, u la kyntu ruh ïa ki dkhot kane ka Society bad ruh ka bor shnong ba kin don ka jingïatrei lang ban pyntreikam lang ïa katei ka ginger processing Unit bad kum ki paidbah ki dei ban sngewthuh ïa ka dor jong ki jingïarap ka sorkar namar lada don kata ka jingïatrei lang ngin dang lah ban leh shibun ki kam kiba bha kiba lah shisha ban ai jingmyntoi ïa ki paidbah nongshong shnong, u la bynrap.
