Paw ka sap ki samla ha ka District Level Youth Exchange Programme ha East Jaiñtia Hills

Khliehriat, Risaw, 25: Ïa ka prokram kaba ar sngi lynter ba la pynlong da ka ophis jong ka District Sports Officer, East Jaiñtia Hills District ka District Level Youth Exchange Programme la pynkut hynnin ka sngi 24 tarik u risaw 2024 bad ka phang pdeng jong kane ka prokram ka ong ‘Ki samla jong ka mynta, ki nongïalam jong ka lashai’ (” Today’s Youth, Tomorrow’s Leader”) , u Sub-Divisional Officer (Sadar), East Jaiñtia Hills District, u Aditya Verma u la long kum u kongsan ha kane ka sngi bad ïa ka prokram la pynlong ha Khliehriat West Community Hall.
Haba kren kum u kongsan, u Aditya Verma u la kren halor katei ka phang pdeng kaba ïadei bad ki samla “Ki samla jong ka mynta, ki nongïalam jong ka lashai’ (” Today’s Youth, Tomorrow’s Leader”) u la pynshlur ïa ki samla ba ki dei ban don ka jingthrang bad jingiohi jngai ïa kiei kiei ki khraw ha ka jingim bad ong ruh ba kaei kaei ka lah ban long ne urlong ha ka jingim lyngba ka jingtrei shitom bad ban don ruh ka jingkut jingmut kaba skhem ban poi sha ka thong, la bynrap shuh shuh da kaba u la ong ba ki nongïalam bunsien ym shym dei ba la kha nongïalam ïa ki hynrei dei ka jingshlur jong ki kaba ai mynsiem bad pynshlur ruh ïa kiwei pat ki samla ruh.
U Aditya Verma, u la ong ruh ba ban long nongïalam ha ka im lang ka sahlang kam shong eh ha ka kyrta jong u/ka briew, u la kyntu ïa ki khynnah skul kiba la wan sha kane ka prokram ba ki dei ban don ka jingmut kaba beit bad ka jingmut jingpyrkhat kaba khuid bad ruh ban bteng bad ïaid shakhmat ha kano kano ka kam ba bha lane ha kano kano ka sap ka phong ba ki don.
Ha kane ka prokram kaba la pynlong ha ki ar sngi lynter ka long beit halor ka ka jingthmu ban kyntiew ïa ki samla bad ai mynsiem ban long ki nongïalam ha ka imlang ka sahlang kumjuh ruh kaba ai mynsiem ban pyndonkam hok ïa ki sap ki phong ba ki don haduh ban da poi sha ka thong, kane ka prokram ka long ruh kum ka jingpashat jingmut ba ki samla ki dei ban tip ba ban poi sha ka thong kam dei kaba suk hynrei kin bun ki jingeh ki jingïaleh ha ki jingïaid lynti ban poi sha ka thong.
Ha katei ka prokram la ioh ruh ïa ki jingrwai, ki jingshad, la don ruh ka science mela, ka jingthoh jingiathuhkhana ne ka story writing, ka quiz, painting bad kiwei kiwei ki jingiakop bad u kongsan lem bad kiwei kiwei ki heh sorkar bad ki riew rangbah jong ka thaiñ ki la sam ïa ki prize sha kito kiba jop ha ki jingïakop bapher bapher.
Ha ka jingïakop thoh jingiathuhkhana lane Story Writing Competition, ka samla Wanda Phi Pala kaba na Jaiñtia Eastern College ka la ioh rah ïa ka nam lah duh lane ka first prize katba ka samla Nisha Shylla kaba na Jaiñtia Eastern College ka la wan ha ka kyrdan ba ar bad ka Mewari Gympad kaba na Star Public School Lumshnong ka la wan ha ka kyrdan ba lai.
Ha ka jingiakop Declamation Competition, ka Juliana Lyngdoh, kaba Jaiñtia Eastern College Khliehriat ka la wan ba nyngkong, ka Pynhunlang Ia-I Syih, Jaiñtia Eastern College ka la wan ba ar bad ka Gloria K Gympad kaba na Good Shepherd Higher Secondary School Ladrymbai ka la wan ba lai.
Ha ka jingiakop thoh Poetry pat ka Wanda Phi Pala, Jaiñtia Eastern College ka la long ba nyngkong, ka Avirginia Dkhar, Jaiñtia Eastern College ka la wan ba ar bad u Well Born Phawa na Seiñ Jait Tuber Higher Secondary School, u la wan ba lai.
Ha ka jingiakop ai rong ne ka Painting Competition, u samla Bright star Dkhar, na Don Bosco College Byndihati, u la ioh ïa ka nam lah duh ne ka first prize, ka Gloria Chyrmang, na Gracious Disciples ka la wan ba ar bad u Bikram Magar, Jaiñtia Eastern College Khliehriat u la wan ba lai.
Ha ka Science Mela Competition pat, u Rangdajied Sympli bad ka Biki Boro kiba la mihkhmat na Jaiñtia Eastern College ki la rah ïa ka nam lahduh katba ka samla Alisha Dkhar bad u Lightning Sumer, Jaiñtia Eastern College ki la wan ba ar.
Ha ka jingiakop rwai Solo Folk Song, ïa ka nam lah duh la rah da ka Good Shepherd Higher Secondary School bad ka Star Public School ka wan ba ar bad ka khynnah kaba na Seiñ Jait Tuber Higher Secondary Schooll ka la wan ba lai
Katba ha ka jingiakop rwai kynhun pat, ka Folk Song Group Category, ïa ka kyrdan ba nyngkong la rah da ka kynhun jong ki khynnah jong ka Seiñ Jait Tuber Higher Secondary School, ïa ka kyrdan ba ar pat la rah da ka kynhun jong ki khynnah kiba na Good Shepherd Higher Secondary School bad ïa ka kyrdan ba lai pat la rah da ka kynhun kaba na Jaiñtia Eastern College.
Ha ka jingiakop shad, Solo Folk Dance, ïa ka nam lah duh la rah da ka Jaiñtia Eastern College , ïa ka kyrdan ba lai la rah da ka Seiñ Jait Tuber Higher Secondary School.
Ha ka jingiakop shad kynhun lane ka Group Folk Dance Competition, ïa ka nam lah duh la rah da ka skul Good Shepherd Higher Secondary School, ka Ephatha Society ka rung ha kyrdan ba ar bad ka Sein Jait Tuber Higher Secondary School ha ka kyrdan ba lai.
Kiba la ïa don ryngkat lang ha katei ka prokram ki kynthup u Block Develop-ment Officer, Khliehriat C&RD Block, u Dr. T. Shylla, ka District School Education Officer, East Jaiñtia Hills District, ka kong A.P Syiem, ka District Sports Officer, East Jaiñtia Hills District, ka kong S.M Rapsang, u District Public Relations Officer, East Jaiñtia Hills District, u bah E.S War bad kiwei kiwei ki heh sorkar, ki nonghikai bad ki khynnah skul bad khynnah college.