Shillong, Risaw 24 : Ka Khasi Hills Autonomous District Council (KHADC) hadien ba ka la ïoh ïa ka muhor na u Lat ka Jylla ïa ka aiñ-rew United Khasi Jaintia Hills Distirct Fisheries (Amendment) Bill 2023, ka la donbor ba kan tuklar lang na ka bynta ban pynneh pynsah ïa ki dohum dohwah kynthup wat ïa ki jingïakob khwai dohkha.
Ïa kane la ïathuh da u CEM ka KHADC, Bah Pynïaid Sing Syiem haba kren bad ki lad pathai khubor hadien ba u Lat ka Jylla u CH Vijayashankar u la ai ka jingmynjur ïa katei ka aiñ-rew ba kan long aiñ noh nalor ki san tylli kiwei pat ki aiñ-rew.
“Kane ka Fisheries Act kaba la don lypa bad mynta dang shen ngi la wanrah ïa ka jingpynkylla ha ki katto katne ki bynta bad kane ruh la ïoh ïa ka jingmynjur. Ka jingmyntoi na kane ka Bill ka long ba ka Principal Act ka la aibor ïa ka District Council ban peit bad ban khmih ïa ki wah kiba rit bad ki wah kiba heh ha Ri khasi na ka bynta ban ïada ïa ki dohum dohwah bad ki dohkha doh pnat.
Shuh shuh u ong ruh ba da ka jingïatrei lang bad ka jingsngewthuh jingmut bad ki bor distrik, na ka liang ka KHADC ka lah ban tuklar lang wat ïa ki jingïakob khwai ban pyrkhing da ka ain haba ai ïa kano kano ka jingbit ban pynlong ïa kum kitei ki jingïakob khwai dohkha ha u pud u sam jong ka.
