Nongpoh, Jylliew 05: Kum ka jingshimbynta ban rakhe ïaka taiew pynneh mariang ne ka World Environment Week halor ka phang “Only one planet focusing on Living Sustainability in harmony with nature” haka shnong Pahamsyiem, ka ophis jong u Divisional soil & Water Conservation Officer Ri-Bhoi District haka sngi thohdieng kala pynlong da ka prokram thung dieng paidbah ne ka mass afforestation ban pynjyrngam biang bad ban pynneh pynsah ïaka mei mariang.
Ha katei ka prorkam u Bah BJ Kahrshandi ADC cum Project Director DRDA u la shim bynta kum u kongsan haka jingdonlang u Bah M Sun DS&WCO, Bah B Rynjah Range Officer ka SWCO, Paiem W Syiem Sirdar ka Elaka Nongpoh, Bah J Lyngdoh Rangbah Shnong bad kiwei kiwei ki riew rangbah.
Haba kren ha katei ka sngi naka liang u Bah B J Kharshandi u la ai ka jingïaroh ïaka ophis u Divisional soil & Water Conservation Officer Ri-Bhoi District kaba la shim ïaka sienjam ban pynlong da ka prokram thungdieng paidbah kum ka jinghikai bad jingpynphriang ïaka khubor sha ki paidbah halor ka jingdonkam ban pynneh pynsah ïaka mei mariang, namar dei ka jingkitkhlieh jong uwei pa uwei u nongshong shnong ba yn lah ban sumar bad ban pynneh pynsah ïaka mei mariang da kaba thung bujli da ki dieng ki siej.
U la ong ruh ba ka sorkar kala shimkhia ban pynlong shibun ki prokram ban thung dieng, ban pynneh bad sumar ïaki tyllong um, ban tyngkai ïaka um bad kumta ter ter ryngkat ka jingshimkhia jong ki bor shnong yn lah pat ban pynurlong ïaka thong ban pynjyrngam biang sa shisien ïaka mei mariang bad ban syrdep biang ïaka jingjot jong ka.
Ha katei ka sngi naka liang ki paidbah bad kumjuh ruh ki khynnah skul kila shim ruh ka bynta ka jingbam smai ban pynneh bad tyngkai ïaka um bad kumjuh ruh ka jingthung dieng ha katei ka shnong.
