Hapdeng ka jingphuh jingphieng plie pyrda ka JCES Balang Presbyterian Mawkhar ïa ka jingrakhe dap 125 snem

Shillong, Risaw 20: “Ngi don tang ban ai ïa ka jingsngewnguh ïa ki jingïaid lynti jong ka Junior Christian Endeavour Society (JCES) jongka Balang Presbyterian Mawkhar ha ka jingrakhe ïa ka jingdap kaba 124 snem jong ka naduh ba la seng ha ka 1900 snem bad kane kadei ka anniversary jong ka jingdap 124 snem jong ka ha kaba ngim lah ban klet ïa ki jingleh bha jong u Blei,” ong u Rev. Pastor B J Syiemlieh haba kren kum u kongsan ha ka jingplie pyrda ïa ka jingrakhe ïa ka jingdap 125 snem jong ka jingïaseng ki khynnah jong ka Balang Mawkhar kaba long hapdeng ka jingiphuh jingiphieng bad jingishongkun shong Blei.
La pynshngaiñ bad pynphuh pynphieng shuh shuh ïa kane ka jingrakhe plie pyrda da ka jingïadon ryngkat lang ki Pastor, ki Tymmen Basan, ki Rangbah Balang, ki Rangbah bad Longkmie ba paw khmat ka Balang, ki Nongïalam bad Nongkitkam barim jongka JCES , ki samla, ki kmie ki kpa bad kiba bun ki paid nongwan jingïaseng.
Ha shwa ban kyntiew ïa ka lama bad ban pynher ïa ki balloon kaba long kum ka dak jong ka jingplie ïa kane ka jingrakhe na ka liang jong u Rev Syiemlieh u la ong ba ki khun barabor ki dei ki nong ïoh kynti jong ka Balang.
“Ha kane ka sngi ngi don tang ka jingai nguh kaba khraw eh ïa u Blei ha kine ki 124 snem ba la leit ha kaba u Blei u la ïarap bad leh isynei ba kane ka jingrakhe mynta kan sa kynjoh sha uwei pat u mawmer uba 125 snem bad ngi kyrmen ba ngin dang ïaibteng ban kyntiew ïa ka Balang ha baroh ki liang,” u la ong.
U la ong ruh ba kane ka jingrakhe ïa kane ka sngi ka ïarap ruh ïa ka Balang ban phai shadien kaei kaba la ïaid bad kaei kaba la kynjoh.
“Ngi dei ban sngewnguh ïa u Blei ba u la ailad ïa ngi ban jam shakhmat ha kum kane ka kam, wat la ka long kaba rit hynrei ka la ïarap ban saiñdur ïa kine ki hep kiba rit ki jong ngi. Ngi dei ban don ka mynsiem ban kyntiew ïa ka society bad ïa ka Balang. Kum ka society phi la buh ïa kane ka nongkynti bad la ïohi ba ki kam phylla ba la leh lyngba kane ka society bad ba ki prokram kin long kiba shitrhem na ka bynta jong ka jingkiew ka Balang,” u la ong da kaba bynrap na ka liang jong u un ïai kyrshan barabor ïa kane ka society ba kan nang kiew bad heh bad san ban tip ïa u Blei.
ïa ka jingïaseng plie pyrda ïa ka jingrakhe la pynïaid da i President ka JCES kum u Shongknor i bah Baika R Lygndoh. Ha ka por ba pynher ïa ka Lama bad ia ki Baloon la ïoh ruh ka jingrwai kyrpang na ka Choir ka JCES. Hadien kane I Pastor i la ïalam nakhmat ban rung shapoj ïing Mane ha kaba bud ki Pastor jongka Balang, ki Tymmen Basan, ki Rangbah Balang ki Nongkitkam ka JCES, ki dkhot Committee, ka JCES Choir bad khatduh ki paid Nongwan Jingïaseng.
Hapoh ïing Mane pat la ïoh ïa ka jingpule na ka ktien U Blei na ki Associete Member ka JCES Mawkhar, jingduwai na I Kong Rimaya Suchiang, jingpynbna na I Bah Khraw D Paswet Secretary ka Working Committee, ka Report treikam na i Miss Emika Syngai General Secretary. La sam ruh ïa ka JCES Merit Award da i Tymmen Basan Besland Marbaniang sha ki arngut ki nongïoh ia ka khusnam I Felicia Sten bad Daniella Bianca Syngai , jingpule ïa ka Historical Events da i bah Tnelang Shullai, jingrwai kyrpang na ka JCES Mawkhar Choir bad khatduh eh la ïoh ïa ka jingsam ïa ki prize sha baroh kiba ïaleh ïa ka Eksamination Kotbah. Kane ka jingrakhe ïa kane ka jingdap 125 kan long baroh shisnem lynter naduh mynta ka sngi tad haduh ka 19 tarik Risaw 2025 kaba dei ka sngi ban pynhap pyrda ïa ka jingrakhe.tip ïa u Blei.