Nongstoiñ, Jylliew 5: Ka Khasi Students Union, West Khasi Hills District ka la ïoh ïa ka jingujor na ki katto katne ki trai bad ki driver jong ki kali kiba thep umphniang na ka petrol pump kaba don ha nongspung, kaba la tip kyrteng kum ka Nongstoiñ Highway Petrol Station, ba ki kali kiba thep umphniang ki shu duh la ka duh yn da poi ha Mawlangkhar bad ka jingujor ka jong ki ka long ba ki don jingsuba ba ka petrol ba ki thep ka khleh lang bad ka um.
Kumta ka seng mar mar ka la leit ban jurip ïa kitei ki kali hapoh Mawlangkhar kaba dei ha ka surok Nongstoiñ-Shillong, ha kaba ki dkhot ka seng ruh ki la lap ïa ka jingpher rong jong ka petrol, kaba ki mechanic ki la sei napoh ka tanky jong kitei ki kali.
Ka seng ka la ïalam ïa ki trai kali bad kumjuh ki mechanic sha katei ka petrol pump kaba don ha ka shnong Nongspung ban leit tohkit ban lap ïa ka jingshisha. Hadien ba la ïakren bad ki trai jong katei ka petrol pump, ka seng ka la dawa ba kin siew ïa ka bai lut ksan jong kitei ki kali kiba la duh bad ki trai jong ka petrol pump ruh ki la mynjur ban siew ïa ka bai lut ksan jong kitei ki kali.
Ka seng ka maham jur ïa baroh ki petrol pump kiba hap hapoh ka West Khasi Hills District, ba kim dei ban die ïa ka petrol kaba lah don jingsuba ba kam dei ka umphniang petrol kaba paka, khnang ba ki paidbah bad ki kali kim don jingthud ha ka lynti ha synkieng bad lada ka seng kam banse ban khang noh shi por.
