Nongstoiñ, Jylliew 5: Namar ba ka jingrakhe jong ka pyrthei shityllup ïa ka sngi pynneh mariang kaba la ju tip kum ka ‘World Environment Day’, kaba dei ka san tarik jong u bnai jylliew ka hap ha ka sngi u Blei, kumta kiba bun ki tnad treikam jong ka sorkar, ki dorbar shnong, ki sengbhalang, ki skul bad kiwei kiwei ki la pynlong noh ïa ka jingrakhe ha kiwei pat ki sngi kaba la sdang naduh ka sngi thoh dieng, sngi saitjaiñ haduh ka lah sngi u Blei.
Ha kaba ïadei bad ka jingrakhe ïa katei ka sngi pynneh mariang ha West Khasi Hills, mynta u snem ka lah ban long kaba kham pher na kiwei pat ki snem. Nalor kata ka dei ka sien ba nyngkong ba ka kynhun jong ki Engineers Megha-laya Centres jong ka tnad sam bording jong ka jylla, kaba don hapoh ka synjuk jong ki Engineers hapoh ka ri India baroh kawei, kaba la tip kum ka Institutions of Engineers, hapoh ka jingïalam jong u bah Makerson Mawlieh Executive Engineer MECL Shillong, u ba dei jong katei ka synjuk, ki la pynlong ïa ka jingrakhe ïa katei ka sngi thung dieng ha ka shnong Mawlieh.
Ka jingpynlong ïa ka jingrakhe ïa katei ka sngi pynneh mariang ka long da kaba ïatreilang bad ka Dorbar shnong, ka skul, ka synjuk ki longkmie, kaba la tip kum ka Village Organisation Mawlieh bad ki samla jong ka shnong. Kum ka jingrakhe ïa katei ka sngi, la pynlong ruh ïa ki prokram ba kyrpang kum kaba thung ïa ki tynrai dieng sawdong jong ka skul bad ki jaka ba lait hapoh shnong, ka jingïakop thoh Essay na ka bynta ki khynnah skul ba kynthup ïa ka Upper bad ka Secondary School, ka jingialehkai phutbol paralok hapdeng ka kynhun ki Engineers bad ki samla jong ka Mawlieh Sport Club bad ka jingpynshai ha kaba ïadei bad ka jingdonkam ban tyngkai bad pynneh pynsah ïa ka mariang.
Ka jingrakhe ïa katei ka sngi ka la long kaba shongkun bha ha kaba la ïashim bynta ban thung ïa ki tynrai dieng da ki Engineers, ki longkmie, ki samla, ki khynnah skul bad ki khynnah rit. Ha shuwa ban sdang ïa ka jingthung dieng la pynlong ïa ka jingïalang ba lyngkot ha kaba la pynïaid da u bah M.C.Mawlieh, ha kaba la ïadon ryngkat da ki u bah P.Shangdiar sordar shnong, ki Engineers kiba la ïa wan na Shillong, ki longkmie, ki samla bad ki khynnah skul.
La ïoh ïa ka jingkren na u bah K.Marbaniang SE ba la shong thait, u bah K.Lyngdoh Lyngkhoi EE bad kiwei kiwei. Kitei ki heh sorkar haba ai jingkren ha katei ka sngi, ki la pynshai ba ka jingrakhe ïa ka sngi pynneh mariang ka la sdang naduh u snem 1972, hadien ba ka United Nation Organisation, ka la pynlong ïa ka jingïalang ka ba heh ha ka nongbah Stockholm ban peit bniah halor ka jing kylla ka mariang, na ka daw jong ka jingpom pathar ïa ki khlaw, ka jingbun jong ki karkhana kiba pynmih tdem, ka jingtih pathar ïa ki marpoh khyndew bad kiwei kiwei.
Nalor kata ki la pynshai ruh ba lada ki dieng ki siej ki khlaw ki btap ki la synlen lut, baroh ki jingthaw ba im naduh ki mrad ki mreng, ki sim ki doh, kin duh jait bad kaba kham sniew ka long ka jingrngad noh jong ki wah, ki umpohliew bad ka jingtyrkhong jong ka mariang kan ktah haduh katta katta ïa ka jingim jong ki briew.
Kaba la kham pynshong shit bad pynitynnad shuh shuh ïa ka jingrakhe ïa ka sngi pynneh mariang ha katei ka shnong, ka long ba ka kynhun ïalehkai phutbol jong ka Institution of Engineers kaba ki nongïashim bynta ha ka jingïalehkai ki dei ki Engineers, SDOs bad ki staff jong katei ka Institution, ki la wan ban ïalehkai paralok bad ka kynhun ïalehkai na katei ka shnong ka Mawlieh Sport Club.
Hadien ba la kut ka jingïalehkai, la sam ïa ki khusnam sha ki khynnah skul kiba la ïashim bynta ha ka jingïakop thoh Essay ha ka ktien phareng, halor ka phang jong ka World Environment Day jong une u snem 2022 kaba ong “Only One Earth”. Ha kajuh ka por la sam ruh ïa ki jingai sngewbha sha ki nongïalam jong ka Mawlieh Village Organisation bad ruh sha ka Dorbar shnong, na ka bynta ban pynsah jingkynmaw ïa ka jingrakhe ïa katei ka sngi pynneh mariang ha katei ka shnong.
