Shillong, Risaw 18: Kum shi bynta na ka jingpynbna ban pynlait noh ïa ka phlim Dhaka bad ba la dep ban pynbna paidbah ïa ka tarik ban pynmih ïa ka phlim Dhaka Escape ha kine ki taïew bad ki bnai ba la dep, ha ka sngi thohdieng na ka liang ka Chwa Syiemlieh Film Production ha shwa ban pyni paidbah ïa ka phlim Dhaka Escape ka la pynlong shwa da ka jingïaid kjat kaba naduh na Khasi National Dorbar Hall Mawkhar shaduh sha Bijou Cinema ha 9-Lad ha kaba ha kane ka sngi la ïashim bynta da kiba bun ki paidbah bad ki riew ieid phlim Khasi.
La sakhi ba ha kane ka jingïaid kjat la wan ban ïashimbynta da ka Myntri ka tnad ka Koit ka Khiah ka sorkar jylla ka Dr Mazel Ampareen Lyngdoh kaba la long kum ka kongsan ha ryngkat ka jingsynranlang u CEM barim ka KHADC Bah Titos Starwell Chyne kum u Symbud kongsan lem bad u Bah Fantin Lakadong MDC jong ka Laitumkhrah Constituency, ki puron ki tyngshop jong ka phlim Dhaka Escape ki nongkyrshan bad ki riew paidbah bad kiwei kiwei.
La ïohi ba ha Bijou Cinema na ka liang ki nongpynïaid jong ka phlim Dhaka Escape ki la pynlong shwa da ka jingïalang kaba lyngkot ha shwa ban ailad ïa ki paidbah ban rung shapoh ka Hall ha kaba na ka liang ka kongsan ka kong Ampareen Lyngdoh ka la pynpaw ka jingkhublei ïa u Director jong kane ka phlim u Bah Section Syiemlieh bad ruh ïa ki tyngshop ki puron bad baroh kiba ïadonbynta ha kane ka phlim bad ka la kular ruh ban ai da ka jingïarap pisa kum ka Myntri bad kan shimkhia ban wanrah ha ka kynhun Myntri ban don da ka Cinema Hall kaba paka ban ïoh pyni ïa ki phlim Khasi kiba la sdang ban kiew bha mynta bad ba ki paidbah ki la wan ban ïa khmih bha mynta ïa ki phlim Khasi.
Ha kaba ïadei bad kane na ka liang ka Kong Ampareen la don ruh kiwei kiwei kiba la ai jingkren ha kane ka sngi ki kynthup ïa u Bah Titos Chyne, Bah Fantin Lakadong, Bah Kansing Lynshiang bad Bah Commander Shangpliang. La pynbyrnia ïa ka jingïalang kaba lyngkot lyngba ki jingrwai bad jingshad ba la ïashimbynta da ki tyngshop bad ki khynnah kiba jop ïa ki jingïakob kiba la pynlong da ka phlim Dhaka Escape nalor kiwei kiwei par ki prokram.
