Shillong, Risaw 18 : Ki shnong na Mawkynrew sha Pingwait bad sha Nohron shen kin sakhi ïa ka jingshna ïa ki surok kiba la mang haduh 25 klur 2 lak tyngka lyngba ka Pradhan Mantri Gram Sadak Yojana (PMGSY)- 3 ka Sorkar India.
Ïa ka surok na Mawkynrew sha Pingwait la mang 7 klur 20 lak tyngka ha kaba ka lynter ka long 5.60 KM katba ïa ka surok na Mawkynrew sha Nohron pat la mang 17 klur 82 lak tyngka ha kaba ka lynter jong ka, ka long 19 KM.
Kane ka ka jingïoh mang tyngka ban shna ïa kine ar tylli ki surok ka la paw lyngba ka jingleit jurip u Bah Banteidor Lyngdoh, MLA ka Mawkynrew Constituency myn ha ka 16 tarik u Risaw, 2024.
U MLA ha kane ka sngi u la ïalam ryngkat ruh ïa ki ophisar ka tnad PWD (Roads) ba dei peit ïa ki jingshna surok lyngba ka PMGSY, kata u Bah A Umdor, Chief Engineer, u Bah S Lytep, Executive Engineer NH Shillong By-Pass Division lem kiwei.
La ïa synran lang ïa u MLA bad ki ophisar pat da ki nongïalam shnong ha katei ka thaiñ bad ki riewrangbah.
Hadien ka jingjurip ïa kitei bynta surok, la pynbud pat da ka jingjurip ïa ka surok terter naduh Nohron shaduh Mawtnum hajan Nongryngkoh. Ha ki khyndiat bnai ba la dep ka la don ka jingtwa khyndew ha ki bynta kane ka surok ha kaba la pynthut ïa ka leit ka wan.
Kumta hadien ba la dep weng ïa ka jingtwa, u MLA u la bthah ïa ki ophisar ka tnad PWD (Roads) ban ker kynroh ïa ki bynta ba don jingsyier kiba lah ban twa khyndew biang lada jia ba la slap bad mynta la dep mang tyngka na bynta kane ka jingthmu.
Ha ka jingjurip u MLA u la kdew ïa ki bynta ba khim bha ka surok bad ki bynta ba long riat kiba donkam ban pynbit pynbiang ïa ki khnang ban nym long jingthut ïa kiba pyndonkam ïa kane ka surok.
Hadien kane la pynlong ïa ka jingïalang ha Mawtnum ha kaba u MLA u la ong ba ka jingthmu ban pynpoi ïa kane ka surok haduh Nongkynroh ka dang don hapdeng ka jingïamir jingmut bad dang thaw lad ban pynurlong.
