Ngin pynlong ïa ka lawei jong ka pateng ban wan kaba lait na ka jingpang bampong : Dr Lyngdoh

Shillong,18 Risaw 2024: Haba kren ha ka lympung jingïalang jong ka ‘FICCI Roundtable for North-Eastern region’, ba la pynlong hapoh jong ka tnad ka Health & Family Welfare, ka sorkar India, halor ka phang ‘Roadmap for Making Cancer Care Affordable and Accessible in India’, I Dr Lyngdoh I ong, “Ka thong jong ngi ka long ba ngin pynlong ïa ka lawei jong ka pateng ban wan kaba lait na ka jingpang bampong, ha kaba baroh ki briew kin ïoh ban phah test bad phah sumar ha ka dor kaba tad.”
I Dr Lyngdoh I la ïathuh ba u myntri rangbah ka jylla Meghalaya u la trei shitom ban pyn thikna ban wanrah ki lad ki lynti kiba paka ban sumar ïa ka jingpang bampong na ka bynta ki nongshong shnong.
U Raj Gore, Chairman FICCI Task Force on Cancer Care bad CEO, Healthcare Global Enterprises Limited (HCG) u ong, “Ka thaiñ shatei lam mihngi ka ri India ka mad ïa ki jingeh kiba kham pher ha ka liang ki lad ai jingsumar, khamtam ha kaba ïadei bad ka jingsumar ïa ka jingpang bampong. Watla ka dei ka thaiñ kaba rit, ka dei pat ka thaiñ kaba bun bha kiba ïoh ïa ka jingpang bampong haba ïa nujor bad kiwei ki jaka ha ka ri. Kane ka dei namar ka jingbun kiba bam bad dih duma, ka jingbym biang ha ki lad ai jingsumar, bad ka jinglap slem palat ïa ka jingpang. Ka jingpyndonkam ïa u duma ka dei kawei na ki daw kaba khraw kaba noh synñiang sha ka jingpang bampong, kaba long kumba 57% jong ka jingpang bampong ha ki shynrang bad 28% ha ki kynthei. Ban leh eiei ïa kane, ka donkam ban don ïa ki lad ai jingïada kiba biang, ka jinglah ban lap klot ïa ka jingpang, bad ka jingïoh ïa ki jingsumar kiba paka.”