Shillong, Risaw 18: Ka sorkar jylla shen kan sa wanrah noh da ka aiñ halor ka jingtreikam jong ka jaka pule doktor kaba nyngkong ha ka jylla kaba la tip da ka PA Sangma International Medical College of University of Science and Technology, Meghalaya (USTM).
Ïa kane ka rai la shim ha ka jingïalang jong ka kynhun Myntri kaba la pynïaid hi da u Myntri Rangbah ka jylla u Conrad K Sangma ha ka sngi Thohdieng.
“Ka kynhun Myntri ka sngewbha ban shim ïa ka rai ba ka sorkar kan ym lah ban shah ïa ka USTM ban treikam khlem da buh da ka aiñ kaba biang kiba long kiba donkam bha ïa ka sorkar ban peit ban khmih haba ïadei bad ka jingai bhah pule doktor, ka jingsiew ka bai pule bad na ka liang ka sorkar kan sa shong biang ïa ka jingïalang jong ka kynhun Myntri hadien ba ka tnat ka Koit ka Khiah kan wanrah ïa ki plan na ka bynta kane ka Act,” ong ka Myntri ka Koit Khiah ka kong Ampareen Lyngdoh haba kren sha ki lad pathai khubor.
Katkum ka jingïathuh jong ka, ka la ong ba ka kynhun Myntri shen kan sa ïakynduh biang ha ka sngi Balang jong ka taïew ban wan.
Ka kong Lyngdoh ka la ong ba ka tnat kan pyrshang katba lah ban pyndep kloi ïa kane ka kam ha shwa ban kut jong une u bnai Risaw, kaba long kaba kongsan na ka bynta ban sdang baroh ki kam pule doktor ne medical course.
Haba kylli na ka liang ka Myntri ka la ong, “Namar kata ngi la pynbeit ïa kane ka jingïeng jong ngi. Ki la don ki jingshim bishar jong ka supreme court kiba la ai por ïa ka sorkar ba kan shna ïa ki Act ne aiñ khnang ba kan ym don kano kano ka jingpynkulmar jingmut haba ïadei bad ka jingai bhah ne seat, ka bai pule jong ki khynnah bad kiwei kiwei. Kumta ngin sa thaw ïa ka aiñ bad kane kan dei ruh ka fast track Act bad dei halor kane ba donkam ban shong biang ïa ka jingïalang jong ka kynhun Myntri.”
“Lada ka long kaba donkam, ngin sa wanrah ruh da ka hukum kaba shipor (ordinance) kaba long kaba donkam katkum ka aiñ ha shwa ban pyntrei kam ïa ka USTM medical college,” ka la bynrap.
Na ka liang ka kong Lyngdoh ka la ong ba kan shym la don kano kano ka jingkulmar na ka liang ka sorkar jylla ha kaba ïadei bad kane ka kam.
“Shisien ba la ai ïa ka NOC sha ka USTM ban sdang noh ïa kane kam pule, ka la don ruh ka jingtyrwa sha ka sorkar jylla ha kaba ïadei bad ki seat hynrei ngin hap ban shah ïalam da ka Act kiba la leh da ka lynti kaba dei, ngi la bud ïa kiei kiba la leh da kiwei pat ki jylla. Kiwei ki jylla ruh ki don la ki jong ki private medical college bad dei halor kane ba ngin hap ïaid katkum ka aiñ,” ka la ong da kaba bynrap ba kam dei eh halor ki 40 ne 30 tylli ki medical seat hynrei kaba donkam kadei ka aiñ.
