Ha ka sngi Baar ka Election Commisssion of India ka la pynbna ban pynlong noh ïa ka elekshon shiteng samoi ha Gambegre Constituency hadien ba u Saleng A. Sangma u la iehnoh ïa ka jinglong MLA namarba ki paidbah ki la jied ïa u kum u MP ba thymmai jong ka Tura Parliamentary Constituency ha ka elekshon Lok Sabha kaba la long mynta u snem.
Kumba ka long mynta ka National Peoples Party (NPP) kaba bat ïa u lakam synshar hapoh ka jylla ka ladep ban pynbna ban pynïakhun da ka Mehtab Chandee Sangma, ka kurim jong u Myntri Rangbah ka Jylla u Conrad K. Sangma, katba ka All India Trinamool Congress ka la pynbna ban pynïakhun da ka MDC kynthei ba marwei ha Garo Hills Autonomous District Council (GHADC) na Dengnakpara ka Sadhiarani M. Sangma kaba dei ruh ka kurim jong u MLA barim ka Rangsakona u Zenith M. Sangma.
Ïa ka Gambegre Constituency la mihkhmat da u Saleng A. Sangma uba la jop na ka tiket jong ka seng Congress hynrei haduh mynta ka Congress kam pat pynbna satia ïa u kyrtong ban pynïakhun ha kane ka elekshon bad kumjuh ruh ka Bharatiya Janata Party (BJP).
Ka Congress kaba sah mynta sa tang uwei u MLA, kan hap ban pynbna noh ïa u kyrtong bad kan hap ban trei shitom bad duriap miet la bad sngi khnang ban wanrah biang ïa ka burom hapoh ka party hadien ka jingryngkang dieng kper jong ki lai ngut ki MLA ka party ba kynthup ia u MLA ka Nongstoiñ u Bah Gabriel Wahlang, u MLA ka Mawhati u Bah Charles Marngar bad u MLA ka Umsning u Dr. Celestine Lyngdoh
Dang ha kine ki sngi ki nongïalam jong ka Voice of the People Party (VPP) ki la hiar sha rilum Garo ban sngap ïa ka sur jong u paidbah shwa ban pynïar ïa ki thapniang. Lehse ka elekshon shiteng samoi ha Gambegre Constituency kan long ka kabu kaba biang tam ïa ka VPP ban tynjuh ïa ka bor ha rilum Garo la ki paidbah ki la pdiang neem ïa kane ka party kumba ka la jop 4 tylli ki Seat ha ka elekshon MLA baladep ha ka ingdorbar Thawaiñ ka Jylla kaba don 60 ngut ki dkhot. Ka jingsar jong ka VPP ha ka elekshon Lok Sabha ba dang shu dep long shen, ka la pynkyndit thret ïa ka NPP bad kumjuh ruh ïa ka UDP kiba long ki seng saiñpyrthei kiba kham heh bad kham bun paid hapoh ka Ingdorbar.
Ka elekshon Lok Sabha ka dei kaba la ai jingsneng bha ïa ki seng saiñpyrthei hapoh ka jylla khamtam ïa ki seng saiñpyrthei ba kham bun paid ha Ingdorbar Thawaiñ bad kane ka pynshai shai ba kim dei ban kheiñ dewthala ne ban shu pynlong khun jakai ïa ki paidbah namar kumba ong ka ktien, “u barit ruh u don la ka kylla bad ka long kaba triem ynda u la khie thiah.”
Ngim pat lah ban klet ba ka jingsneng kaba ki paidbah ki la ai ïa ka NPP, ïa ka Congress, ïa ka UDP-HSPDP ka long ba ki la kyntait ïa ki sbai rupa ha ka por elekshon bad ki la jied ban pynjop donburom ïa u kyrtong ka VPP u Dr. Ricky AJ Syngkon. Lada kan ïai long ha kane ka dur, ka tnat pynïaid elekshon ka la suk bha ban treikam namarba ka pisa kan ym treikam shuh ha ka por elekshon hynrei u paidbah hi un phaikhmat bad un jied ïa ki kyrtong kiba lah ban trei bad kiba lah ban pynurlong ïa ki jingdawa hynrei ym tang ban shu heh tang ka ktien ha ki rynsan ïalap elekshon ban kit ban bah khala lut kat ïa kaba don namarba ynda u paidbah hi u la pynphong ïa ka pansngiat bad pynshong ha ka shuki, ka long kaba eh jwat pat ban trei.
Tang hapoh 24 kynta ba ka Election Commission ka la pynbna ïa ka tarik pynlong elekshon ha Gambegre Constituency thret kumba iuh tdong bseiñ, mih kynsan bluit ka All India Trinamool Congress kaba la ujor sha u Returning Officer jong ka West Garo Hills District da kaba kynnoh ba ki nongtrei ka National People’s Party (NPP) ki la pynkheiñ ïa ka Model Code of Conduct da kaba sam ïa ki tin sop iing sha ki nongshong shnong jong ka shnong Aminda Simsang kaba hap hapoh ka Gambegre Constituency tang ban khroh vote. Lada ka long ha kane ka dur, imat ka pisa kan treikam da kawei pat ka lynti, kata, ban shu sam noh da ki tiar ki tar.
Ki bor pynïaid elekshon ki hap ban peitngor bha ïa kine ki jingjia namarba ka lam sha ka jingnoh shiliang ka tarajur lada ym tohkit bniah bad lada ym pynshitom katkum ki kyndon jong ka aiñ.
