Bun ki nam lahduh khur ki rang bad ki thei heh ksah ha ka Mr. Meghalaya bad Mr. & Ms. East India Zonal

Shillong, Risaw 15 : Ha ka lympung ïakob pyni dohksah jong ka 19th Mr. & Ms. Meghalaya kumjuh ïa ka 4th Mr. & Ms. East India Zonal Competition kaba long dang shen la sakhi ïa ka jingwan shim bynta jong ki 170 ngut ki samla na kylleng ki bynta jong ka Ri.
Nalor ki nongïalehkai, la wan ban donlang ruh ki nongpynïaid bad ki nongbishar naduh ka jylla West Bengal, Assam, Orissa, Jharkhand bad Manipur.
Ha ka thup ïa kob Mr. Meghalaya kaba ju long man u snem ki la don haduh 90 ngut ki nongshim bynta ha ki 14 tylli ki thup ïalehkai.
Ha ka East India Zonal Competition pat ki la don 80 ngut ki nongshim bynta kiba mihkhmat naduh West Bengal, Manipur, Assam bad Meghalaya kiba ïa knieh ïa ka nam lahduh ha ki 17 tylli ki thup ïalehkai.
Kane kadei ka sien kaba nyngkong ba ïa kitei ki ar tylli ki lympung ïalehkai yn pynlong ha kajuh ka sngi. Ïa ka jingïakob ba dei jong ka Meghalaya ba pynlong ha ka por mynstep ka long ruh kum ka lympung knieh rung na ka bynta ka thup ïakhun East India competition nalor ba ki don ruh ki nongïashim bynta ha ka Women’s Glamour Category.
Ki nongjop naman ki thup ïalehkai ki la shah jied pat ban ïoh ïa ka lad ban mihkhmat ïa ka jylla ha ka Zonal competition lane ha ka National competition kaban long ha Chennai.
Ki lahduh ha baroh ki lympung ïakhun (overall winner) ha ka thup jong ka jylla ki kynthup ïa u Daman Poktai ha ka thup Men’s Denim Jeans Model na ka Body Zoo Gym.
Nangta ha ka thup Men’s Bermuda Model lajop da u Bonjovy Ch Marak na ka Iron House Gym. Ha ka thup Women’s Sports Model lajop da ka samla Daribha Kharkongor na ka Iron House Gym.
Ha ka thup Women’s Glamour la jop da ka Larisa Z. Syiem na ka Flag’s Fitness First. Ha ka thup Men’s Body building la jop da u Alfein Harris Nongrum na ka Muscle Up Gym.
Ki nongjop ha ka thup Zonal competition pat ki long – Men’s Denim Jeans Model la jop da u Daman Poktai, ha ka Men’s Bermuda Model (Junior) la jop da u Pyndapbor Dkhar, ha ka thup Men’s Bermuda Model (Overall) la jop da u Akash Choudhary, ha ka Men’s Junior Body Building la jop da u Pyndapbor Dkhar kiba dei baroh na Meghalaya.
Ha ka liang ki kynthei pat, ha ka thup Women’s Sports Model la jop da ka samla Daribha Kharkongor na Meghalaya katba ha ka Women’s Glamour la jop da ka Rini Betal na ka jylla West Bengal. Katba ha ka Men’s Body Building la jop da u Pritam Sunar na Meghalaya.