Nongpoh, Risaw 13: Da ki hajar ngut ki paid Hindu na ka thaiñ Nongpoh mynta ka sngi ki la shim bynta ha ka lehniam ka leh rukom ban pynkut noh ïa ka lehniam Durga Puja, kaba ki la leit ban shim bynta ruh da kaba pynngam um ïa ki blei ha ka Wah Umtrew ha Byrnihat kaba long shi bynta ka jinglehñiam puja ban pan ka jingkyrkhu khyrdoh na ki blei.
Ki paid Hindu na ki ar tylli ki Mandir, kata ka Ram Mandir bad ka Maa Kali Mandir ha Nongpoh, ki la mih ban shim bynta ha ka jinglehñiam bret blei kaba la sdang na Nongpoh ban ïaid ter ter shaduh ka wah Umtrew ha Byrnihat na ka bynta ban pyndep ïa kata ka lehñiam pynngam um ïa ki blei ha ka wah.
Ryngkat ki rong ki rup, ka put ka tem, ki paid Hindu ki la shim bynta ban lehkmen na ka bynta ban pyndep ïa kane ka lehñiam durga puja, kaba dei ka sngi kaba ki pynkut ïa ka jingpyngam um ïa ki blei ha ki wah, kaba dei katkum ka jingngeit jong ki.
Haba kren sha ki lad pathai khubor, u Secretary jong ka Ram Mandir u Muneshwar Singh u la ong ba ki riewngeit Hindu ki sngewkmen ba ki lah ban pyndep noh ïa kane ka lehniam Durga Puja bad ka jinglah jong ki ban pyndep ïa kane ka lehniam Puja ka dei hi ka jingkyrshan ym tang ki paid Hindu, hynrei na baroh ki liang bad kiwei kiwei ki para jaid bynriew kiba la ai jingkyrshan ïa kane ka lehniam.
Kane ka Committee ka ai khublei ruh naduh ki bor synshar shnong, ki bor District, ka tnad Pulit bad baroh kiba la don bynta ha kaba kyrshan ïa kane ka jinglehniam Puja kaba suk ba saiñ bad kaba kmen.
Shuh shuh ka khubor, kaba ki kwah ba ai ka long ban pan bor na ki blei ba kan ai kata ka jingkyrkhu na ka bynta ban bha ban miat bad ban beh ïa ki kam sniew bad khamtam ban pynneh pynsah ïa ka shongsuk shongsain bad kam pher war la ngi ïa shong ïasah hapdeng ki para jaid bynrew bapher bapher, namar dei tang ka jingpynneh ïa ka shongsuk shongsaiñ ngin lah ban kiew shaphrang ha ki liang baroh, u la bynrap.
Jowai: Ka lehñiam Durga Puja ha Jowai kala poi noh sha kaba kut mynta ka sngi Blei bad kane ka jinglehñiam mynta u snem ka long kaba ïaid beit ïaid ryntih ha kaba la shim bynta pura da ki nongpynïaid jong ka Sarbajann Durga Puja Committee, ki riewngeit Hindu kynthup naduh longkmie ki longkpa ki khun samla bad ki hep kiba rit.
Ha kane ka sngi, ha Jowai la leit pynngam um ïa ka Blei Durga ba la shna kyrpang ha ki bynta jong ka wah Myntdu ha ryngkat ka risa mane Blei, hadien ba la dep pynngap um ïa ka Blei Durga la teh ïa ka da u tylli khnang ba yn leit pynkhiud ïa ka lashai ka sngi.
Ban ïaid beit kane ka lehñiam mynta ka sngi ki bor sorkar naduh ka tnad pulit bad ki bor pynïaid District kiba don lang haduh ba la pyndep ïa ka jingleit pynngam un ïa ka Blei Durga. Ïa kane ka juh ka lehñiam Durga Puja ha West Jaiñtia Hill la leh kumjuh ha Nartiang kaba dei ka lehñiam Durga Puja ki Pnar, ha Muktapur bad ha Dawki.
