Shillong, Risaw 12: I Dr. Careen E G Marbaniang hadien ba ila shah pynkup burom hapoh ka Seng Kynthei Mawkhar Welfare Organisation ha ka sngi saitjaiñ lyngba i kong Silbi Passah Padmashree kum i kongsan, ila pynpaw ïa ka jingai khublei ïa ka seng kaba la kynmaw ïa ki kam ba ila leh na ka bynta ka jingbha jingmiat ha ka kam pule puthi.
Haba ai jingkren ai mynsiem ïa kiwei pat ki samla pule kiba la shah pynkup burom lang ha kane ka sngi na ka liang i kong Marbaniang hadien ba i la dep ruh ban ïoh ïa ka District Award mynshem snem ha kaba ïadei bad ki kam hikai bad mynta u snem da ka State Award ila ong ba kane long ka jingai mynsiem ïa ki samla kiba dang sdang kiew ha baroh ki liang.
“Ha ki snem ba la leit na ka liang ka shnong ka shait ai ïa kum kine ki khusnam bad kum ki khun Kristan dei ban pyndonburom ïa u Blei naba kiwei ki peit ïa ka ïaid ka ïeng jong ngi, dei ban pynduburom ïa ka shnong haba ka leh ïa kum kine ki kam kiba bha ban kyntiew ïa ka jingnang jingtip. Nga don ha kam pule bad mynta nga dang leit ai ruh ki jinghikai sha ki shnong kiba kyndong kynshrot ban ïarap lem ïa ki khun samla bad ïa ki para nonghikai ha kaba ïadei bad ki jingshem kiba thymmai kiba ka sorkar kan pynmih,” ong i kong Marbaniang.
I la ong ba ka jingshisha im kwah satia ban put turoi ïa ki kam ba ila leh ha kaba ïadei bad ki kam ki jingnohsynniang ïa kiwei ruh ki skul, ne ki jingleit ai training sha ki skul nongkyndong ïa ki jingmih kiba thymmai.
“Kum ha ka por COVID ka sorkar ka la jied ïa nga kum ka facilator ban ai jinghikai sha ki skul bad nonghikai. Haba wan ka NEP ngi dei ban pdiang ïa ki jingkylla khnang ba ka jylla jong ngi kan ym sahdien, dei ban treishitom minot ha ki kyrdan ba shajrong bad pynduburom ïa u Blei,” ila ong.
Ha kawei pat ka liang i President jong ka Seng Longkmie i kong S N War ila iathuh ba ka seng kynthei ka la pawnam ha kylleng ki jaka halor ki kam babha ba la leh ha kiba bun ki liang.
“U 2004 u dei u snem ka jingsah jingkynmaw ba ki kynthei ka shnong ki la pynlong ka jingïakynduh ha kaba la seng ïa kane ka seng kynthei. Hapoh ka seng ki longkmie baroh kidei ki dkhot bad ka don ruh la ki jong ki Executive Member. Kane ka EC ka la trei borbah ki kam ba ratbah ba ka la leh, ka jingpynduh ïa ka kiad, kiba ïeng bad dih kiad ha surok. ka seng ka ju leit pahara ha Shnong, ka ïarap ïa ki longïing kiba duk kiba kyrduh,” ong i President jong ka seng.
I la ïathuh ba ha u snem 2005 kane ka seng ka la register ïalade hapoh ka society kaba dei ruh ha ka 22.11.2005 bad la ïoh ka jingithuh. Ka la don la ki kyndon bad ka la ai jingmyntoi shibun ïa ka seng. Ki longkmie na ka bynta ka jingbha ka seng ki shait ïatreilang ha kiba bun ki liang la ka long ha ka sngewsih ne sngewbha.
Ha kane ka sngi la ïoh ruh ka jingkren na u Assistant Rangbah Shnong u Bah Ransom Sutnga, ka jingkren ai khublei na i Secretary kong H B Lymba bad la don ryngkatlang da ka Deputy Commissioner ka East Khasi Hills ka kong R M Kurbah kaba dei ruh ka dkhot jong kane ka Seng Kynthei jong ka shnong Mawkhar.
