Shillong, Risaw 12: Ka IIM Shillong dangshen ka la pynbna ba ka la ïatreilang bad ka James Cook University (JCU), Singapore da kaba ïasoi ïa ka Memorandum of Understanding (MoU).
Kane ka jingïasoi ïa ka MoU ka dei ruh kaba 25 ïa ka IIM Shillong kaba pyni ïa ka jingtrei shitrhem ha ka ban kyntiew ïa ka jingïatreilang bad ki paralok jaka pule na kiwei pat ki ri.
Kane ka jingïatreilang ka thmu ruh ban thaw ïa ka rukom treikam kaba paka ha kaba ïadei bad ka pule puthi, ka jingïasam ha kaba ïadei bad ka kolshor bad ka jingleh lang ïa ki jingwad bniah ka ban long ka jingmyntoi ïa ki samla pule bad ki nonghikai.
Kane ka jingïatreilang ka IIM bad ka JCU kan plie lad ruh ha ka ban kyntiew ïa ki prokram kiba ïadei bad ka jingpule, ka jingïasam mar kylliang ïa ki jingnang jingtip bad kiwei kiwei bad la pynwandur ban kyntiew ïa ka jingpule bad ka jingsam mar kylliang ïa ki jingshemphang bad ki jinghikai hapdeng kine ki artylli ki jaka pule.
