SHILLONG, Risaw 09: Ka Nongkseh SC bad ka Mawtawar SC ki la ïoh ban khur jingjop ha ki jingïalehkai ka lympung First Division 2024 jong ka Shillong Sports Associayion, ba la long ha ka Sngi Balang (09.10.2024) ha SSA Ground, Polo.
Ha ka jingïalehkai kaba nyngkong, ka Nongkseh SC ka la pynjemkhnap ïa ka Umphyrnai SC da 4-1 kol. Ka Nongkseh ka la ïoh ban pynkhih lai kol ha ka kylla step, lyngba u Meban Marsharing (14 min), Samphrangshai Rani (34 minit) bad u Chesterpaul Lyngdoh (36 min). Katba u Diverjohn Syiemlieh u la pynphai shi kol na bynta ka Umphyrnai shuwa ban kut ka kylla ba nyngkong (45+3min).
U Chesterpaul Lyngdoh u la pynthikna namjop ïa ka Nongkseh da kaba thep ïa ka kol kaba ar ïalade bad kaba saw ïa ka kynhun ha ka minit kaba 81 jong ka kylla miet.
Ha ka jingïakhun kaba ar, la sakhi ïa ka Mawtawar SC kaba la pynliem noh ïa ka Nongrah SC da 2-1 kol, ha kaba baroh lai kol ki la wan ha ka kylla miet. Ki kol na ka Mawtawar la thep da u Fedrick Lyngdoh (52min) bad ka kol kaba kum thep hi da u John Marboh ha ka 80 minit (player ka liang pyrshah). Na ka Nongrah la thep da u Mebankit Lyngdoh (90+1 minit).
Ki jingïakhun ha kane ka Sngi Palei (10.10.2024) kan long ha ka kyrdan Second Division. Ha ka por 12 baje, ka Laitlyngkot SC kan aireng ïa ka Nongkrem SC, nangta kaba bud ha ka por 2:45 baje nohphaisngi, ka Lumshyiap SC kan ïakhun pyrshah ïa ka Marbisu SC.
