Nongpoh, Risaw 03: U Jayant Chaudhary, Myntri Khynnah ka tnat Skill Development bad Entrepreneurship bad myntri khynnah ka tnat Pule Puthi, u la leit jngoh ïa ka kper sohtrun ha Nongkhrah, Ri Bhoi District hynnin ka sngi ban ïakynduh ïa ki nongrep hapoh katei ka thaiñ. Ha katei ka jingïakynduh, u Myntri u la ïakren bad ïatai bad ki nongrep halor ki jingïakynduh jingeh kiba ki mad ha ka rep ka riang hapoh ka thaiñ bad kumjuh ki lynti ki jingmyntoi ban pynbha ïa ka rep ka riang.
U Myntri u la leit jngoh ruh ïa ka PM Shri School, Jawahar Navodaya Vidyalaya (JNV) ha Niangbari, Ri Bhoi, ban shim bynta ha ka jingrakhe Gandhi Jayanti bad Shastri Jayanti. Ha katei ka prokram, la ïadonlang ruh u Deputy Commissioner, u Abhilash Baranwal, u MLA ka Nongpoh u Bah Mayralborn Syiem, u MDC Nongpoh u Bah Balajied Ranee, bad kiwei pat ki ophisar ka district.
U Myntri u la ïakren bad ki khynnah pule JNV kiba na ki jylla bapher bapher ka thaiñ shatei mihngi lyngba ka Smart Class bad ka video conferencing bad plie ruh ïaka exhibition kaba pyni ïa ki nongrim jong u Mahatma Gandhi, u Lal Bahadur Shastri, bad u Choudhary Charan Singh, bad ioh ruh ban ïakren bad ki khynnah pule ha katei ka jingïalang.
Shuh shuh, la ai jingïaroh ïa ki lai tylli ki shnong ka Myrdon Mawtari, ka Nongsder, bad ka Nongtraw ba la ïoh ïa ka kyrdan Open Defecation Free Plus.
