Ha ka Swachhta Hi Seva, la pyllait paidbah ïa ki 11 tylli ki kali kit ñuit ha Mawkyrwat

Mawkyrwat, Risaw 02: Ka ophis jong u PHE Mawkyrwat Division-cum-Member Secretary District Swatch Bharat Mission South West Khasi Hills District, Mawkyrwat mynta ka sngi ka 2 tarik u Risaw, 2024 kum shibynta jong ka jingrakhe ïa ka lyngkhuh sngikha u Mahatma Gandhi bad ka jingrakhe ïa ka Swachhata Hi Seva ka la ïoh ban pyllait paidbah ïa ki 11 tylli ki kali kit ñiut kiba tip kum ki E-Vehicle kiba dei lyngba ka skhim Swachh Bharat Mission.
Lah ban kdew ba ïa ki 11 tylli ki kali kit ñuit la ïoh ban aiti sha ki Cluster Village Waste Management Committee kiba hap hapoh jong ka Ranikor C&RD Block kata da u Executive Engineer ka PHE Mawkyrwat Division, u bah K. Nongbsaw ha ryngkat ka jingdonlang u bah I. Lawriniang, MCS, BDO ka Mawkyrwat C&RD Block, u bah S. Marweiñ, MCS, BDO ka Ranikor C&RD Block, u bah I. Kharbudon, bah F. Thongni u ba dei u SDO Ranikor, bah Shekborlin Shiangbai, District Co-ordinator jong ka District Swachh Bharat Mission (DSBM), Mawkyrwat lem bad kiwei de.
Haba kren ha ka jingïalang, u Executive Engineer ka PHE Mawkyrwat Division-cum-Member Secretary District Swatch Bharat Mission South West Khasi Hills District, Mawkyrwat, u bah K. Nongbsaw u la ïathuh ba ïa ki 11 tylli ki kali la aiti ba kin long ka jingïarap ha ka ban kit ïa ñiut khnang ban wanrah ïa ka khuid hapoh ki shnong ki thaw namar lah ban ong ba kine ki kali kin ïarap ban leit lum ïa ki ñiut ki bym kput na manla ki shnong kum ki nar, ki bilor, ki plastik bad kiwei kiwei ha kaba ïa kine ki ñiut ynsa lum ha ki Collection Centre bad hadien ba la sait la pynryngkhiang ynsa lah ruh ban die ïa ki.
Ym tang kata, ha kajuh hi ka sngi la ïoh ban pynlong ruh ïa ka program ba la tip kum ka Special Gram Sabha na ka bynta ka jingpynneh pynsah ïa ki tyllong umbam umdih ha kaba la wan ban ïashimbynta da ki nongïalam shnong jong ka Mawkyrwat bad Ranikor C&RD Block.