‘Buh thong ka sorkar jylla ban thungdieng haduh 2 hajar hectare’

Jowai, Jylliew 03: Ka ophis jong ka Divisional Soil & Water Conservation Officer Jowai Territorial Division Jowai shi bynta ban rakhe ïa ka sngi pynneh pynsah mariang ne ka ‘World Environment Day’ kala pynlong ïa ka prokram mynta ka sngi ha Hula madan phutbol Moosyiem Shangpung West Jaiñtia Hills, halor ka phang kaba ong (Only One Earth, “Living Sustainably in Harmony with Nature”).
Ha kane ka sngi ïa ka jingïalang la pynïaid da u ma T. War S&WCO Jowai Territorial Division Jowai, ha ka jingdonlang u MLA ka thaiñ ma Comingone Ymbon uba dei u Chairman Meghalaya Industrial Development Corporation jong ka sorkar jylla kum u kongsan, ryngkat u symbud kongsan u Dolloi ka Elaka Shoangpung ma Chanki Lyngbang, ma L. Sohlang AS&CWO Jowai Territorial Division, ki nongshong shnong, ki khynnah skul bad kiwei de kiba la shah khot sngewbha.
La rakhe ïa kane ka sngi shi bynta ban naka jingdap 50 snem ka jylla bad ka jingdap 75 snem ka Ri India ne ka ‘Azadi ka Amrit Mahotsav’, ha kane ka juh ka sngi la pyllait ïa ka skim ‘Afforestation Scheme 2022-23’ kaba dei ka prokram thungdieng.
U ma Coming Ymbon haba ai jingkren ula kuntu ïa baroh ki nongshong shnong naduh ki paidbah, ki nongïalam shnong haduh ki nongtrei ka tnad khlaw ba kin pynshitom da kaba tyngeh ïa kino kino ki briew kiba leh pyrshah ne pynjulor ïa ka mariang.
“Na ka liang ka sorkar jylla kala buh ïa ka thong ban thungdieng ha ka jingheh kaba 2 hajar Hectare bad lyngba kane kan wanrah biang ïa ka jingjyrngam jong ka mariang”, hynrei lada kren ïa katei ka subject ula ong ba ka District kala tikna ba kan dap satang da ki khlaw ki bniat ba itynnad.
Hynrei kaba donkam eh ban pynurlong ïa kane ka thong ka long, hadien bala dep ban thung ïaki tynrai dieng dei ban buddien ïa ki da kaba leit sumar manla ka por khang ba kitei ki dieng kin ïoh ban heh ban san.
Ula ong balei ba kane ka jingshit ka dang ïai kiew katba dang mih ki sngi kaba la poi haduh 45-45 degree sha kiwei ki jylla kum ha Delhi, hynrei ‘phim ym lap satia kum kane ka mariang ba pyngngad kaba don hapoh ka Jylla Meghalaya kaba la kyrkhu kyrpang da U Blei’.
Shuh shuh ula pynsngew katkum ka aiñ jong ka sorkar kmie uno uno uba pom dieng pathar u lah ban shah pynshitom da kaba un hap ban thung haduh 10 tylli ki tynrai, hynrei ha kine ki thaiñ kiba pom dieng haduh shi hajar tylli ki thung pat tang 5 tylli ki tynria dieng, kumta u buh ka jingkyntu ha ki khynnah skul ba ki dei ban shim ïa kane ka bynta bad ban pynsngewthuh ïa ka jingud jong ka mariang.
U Dolloi ma Langbang ula kyntu jur ïa baroh ‘dei ban long kiba sumar bha ïa ka mariang, khnang ban lait na ka jingshah kdew kti ha ki pateng ba dang wan’.
La pynshong shit shuh shuh ïa kane ka sngi da ka jingïashim bynta da ki jingrwai bad ki jingtem tynrai na ki khynnah skul ka Presbyterian Higher Secondary Shnong Shnongpung bad ka Shlem Iongki Sur Tynre Shnongpung.
La sam ruh ïa ki khusnam sha ki nongjop da u kongsan bad u symbud kongsan sha ki khynnah skul kiba la jop ha ki jingïakop bapher bapher bad kumjuh sha ki nongrwai kiba la shim bynta mynta ka sngi, Katba ïa ki kyntien ai khublei la ïoh na ka kong E. Shylla AS&WCO JTD Jowai. Hadien kane ka prokram la ïashim bynta lang ban thung ïa ki tynrai dieng.