Mawkyrwat, Risaw 01: Kum shibynta jong ka jingrakhe ïa ka Swachhata Hi Seva 2024, ka ophis jong u PHE Mawkyrwat Division-cum-Member Secretary District Swachh Bharat Mission, South West Khasi Hills District ka la pynlong da ka 10km Swachhata Marathon 2024 kaba la sdang na phyllaw ka ophis PHE – Jakrem – Sakwang – Pyndensakwang – District Court bad pynkut hi ha phyllaw ka ophis PHE.
Kiba la wan ban ïa shimbynta ha kane ka 10km Swachhata Marathon 2024 ki don baroh kumba 200 ngut ei ei kynthep naduh kiba hapoh shiphew snem, kiba hapoh khadsan snem bad kiba hajrong ïa ka khadsan snem ha kaba ka kong Kmoiñ Wahlang ba la shim ruh ban kaweh lama na ka bynta ki nongmareh ha ryngkat u bah K. Nongbsaw, Executive Engineer ka PHE Mawkyrwat Division.
Ha shwa ban sdang ka jingmareh, la ïoh ban pynlong ka jingïalang ba lyngkot ha kaba ka kong Kmoiñ Wahlang ka la ai jingkren ryngkat ka jingkyntu ai mynsiem na ka bynta ki hep kiba rit bad ki samla shynrang bd kynthei kiba la wan ïa shimbynta ha ka jingïakop mareh thong. “Lada ki nongmareh ki kwah ban poi sha ka thong jong ka jingjop ki dei ban da trei shitom ryngkat ka jingkut jingmut khnang ba kin ïoh kheit ïa u soh jong ka jingjop”, ong ka kong Kmoiñ. Namarkata, ka la ai jingkitbok kitrwiang na ka bynta baroh ki nongïashimbynta ba kin ïa leh bha khnang ba kin jop ha kane ka jingïakop.
Haba kren ha kaba ïa dei bad ka jingpynkhreh jong ka ban leit sha ka 13th Pan Pacific Masters Games 2024 ka ban sa long ka Gold Coast, Queensland, Australia ka la kyrpad ïa ki paidbah ba kin ïa kyrshan lem ïa ka lyngba ki jingdwai khnang ba kan sa poi suk poi saiñ ha ka jaka ba ka thmu ban leit bad ïoh ban pyndep ïa ki kam baroh khamtam ba ka rah ïa ka jingjop ha ka jingmareh.
Ki nongjop ha kane ka jingïakop mareh thong ki long kiba hapoh 10 snem kynthei dei ka Larikmen Kharwanniang, ba ar ka Phibanylla Kharwanniang bad ba lai ka Daphilasaphi Kharjahrin katba jong ki shynrang ki long u ba nyngkong u Geraldeozio Ramsiej, ba ar u Joyfulson Wartde bad ba lai u Kevinstar Kharwar.
Nangta, kiba hapoh 15 snem ki long shynrang u Jimwilson Ramsiej ba nyngkong, ba ar u Donborlin Mawlong bad ba lai u Banlumlang Kharjahrin bad jong ki kynthei ki long ka Larijanai Wartde ba nyngkong, ba ar ka Rikynti Kharjahrin bad ba lai ka Meryfullness Ramsiej.
Nangta, ki nongjop ha ka kyrdan ba 15 snem ha jrong ki long shynrang u Biness Kharlyngdoh, ba ar u Iwelljohn Ramsiej bad ba lai u Wonderful Paliar bad jong ki kynthei pat ki long Ibandarisha Kharwanniang, ba ar ka Bandasharai Marweiñ bad ba lai ka Barisha Lyngdoh.
Ha kajuh hi ka sngi, ka ophis jong u Executive Engineer jong ka PHE Mawkyrwat Division ha ryngkat ki nongtrei mynta ka sngi ha ka jingpynlong ïa ka jingïakop mareh, da ka mynsiem jong ka jingieit ki la ai jingkyrshan ïa ka kong Kmoiñ Wahlang da kaba ki la ïa synñiang pisa ha kaba ïa ka pisa la aiti da u bah K. Nongbsaw, Executive Engineer ka PHE Mawkyrwat Division.
