Shillong, Nailur 29: Ki Seng pynïaid kam jngohkai kynthup ki Tour Operator ha Meghalaya, kila ïa rai lang ban pynneh ïa ka jinglong ba shongsuk shong shngaiñ hapoh ka Jylla na ka bynta ka jingmyntoi jong baroh ki kynhun ba don bynta ha ki kam jngohkai bad ruh ki nongwankai.
Kane ka rai ka dei kaba la shim ha ka jingïalang ba la pynlong da ka Tour Operators Association of Meghalaya (TOAM) bad ba la wan ïashimbynta da ki 11 tylli ki seng pynïaid kam jngohkai bad ki Tourist Taxi Association, kaba long ha State Convention Centre, Shillong ha ka sngi Saitjaiñ.
Ka jingïakren ka la phaikhmat eh sha ki kam ba ïatakhuh da ki nongñiah kali Tourist, khamtam ki jingpynsngew jong ka All Khasi Meghalaya Tourist Taxi Association (AKMTTA).
“Hadien ka jingïamir jingmut kaba bniah bha, ki dkhot jong baroh ki seng kila mynjur ïa ka jingkongsan ban pynneh ïa ka shongsuk shongsaiñ ha Meghalaya na ka bynta ka jingmyntoi jong baroh ki kynhun ba don bynta ha ki kam jngohkai bad ki nongwankai. Kila kular ruh ban pynthikna ïa ka jingshngaiñ bad jingïada ïa ki nongwankai kiba wan sha Jylla,” ong ka kyrwoh.
Ki 11 tylli ki seng pynïaid kam jngohkai ka Meghalaya ki kynthup ïa ka Meghalaya Tourism Development Forum (MTDF), All Khasi Meghalaya Tourist Taxi Association (AKMTTA), Tour Guides Association of Meghalaya (TGAM), All Shillong Tourist Taxi Drivers Union Organization (ASTTDUO), Meghalaya Tourist Taxi Association (MTTA), Federation of Shillong Hotels (FOSH), Sohra Region Tourism Association (SRTA), Jaiñtia Tourism & Environment Society (JTES), Khasi Hills Tourist Taxi association (KHTTA), bad ka Ri Bhoi Tourism & Environment Development Forum (RBTEDF).
