Shillong, Nailur 29: Ka khubor ba la ïoh na ki pulit la ïathuh ba kawei ka longkmie kaba na Shillong ka la phah ka jingujor ba ha ka 7 tarik mynta u bnai, ki runar bym lah ban ithuh ki la thok ïa ka para jong ka, ka pisa kaba la kot kumba T. 2 lak, online, katba ka dang thmu ban book ïa ki tiket ban leit jingleit.
Ha kawei pat ka jingjia uwei u nongñiah ka Rapido u la phah ka jingujor ba ha ka 19 tarik mynta u bnai ha ka por kumba 11 baje mynstep, uwei u briew u bym lah ban ithuh ba la kynnoh ruh ba u dei uba la buiad kiad u la shim wai ïa ka scooter jong u kaba don u nombar ML-05Y-9498 na Anjalee, Shillong ban leit sha Lyngkhoi (EWKH). Hynrei ynda la poi ha Mairang, u tei u nongshong thuk thuk bym lah ban ithuh, da ka bor u la knieh ïa ka mobile phone bad ka T. 300/- jong u bad u la pyrshang ban shim ruh ïa ka scooter jong u.
Shuh shuh ki pulit ki la ïathuh ba kawei ka longkmie napoh ka nongbah Shillong ka la ujor ba ha ka 28 tarik u Naiwieng, 2023, ka la ai ïa ka jingdeng ba kordor ha kawei ka dukan Jewelry ‘S Marweiñ’ kaba ha Ïewduh, Shillong ha kaba ka la siew ruh ka pisa advance T. 20,000/- bad ïa katei ka jingdeng ryndang kaba da ka ksiar jong ka la dei ban pyndep ha ka 28 tarik u Rymphang, 2024. Hynrei ha ka 28 tarik u Rymphang, 2024, u trai ka dukan u la kyntait ban pynphai ïa katei ka jingdeng ksiar jong ka.
